ლარის კურსი გამყარების ტენდენციას განაგრძობს. 1-ელი მარტის ვაჭრობის შედეგად, საქართველოს ეროვნული ვალუტა აშშ დოლართან მიმართებით კიდევ 0.69 თეთრით გამყარდა, შედეგად ერთი დოლარის ოფიციალური ღირებულება 2.6127 ლარი გახდა. ბოლო დღეების განმავლობაში 2.60-იან ნიშნულს რამდენჯერმე დაუახლოვდა კურსი Bloomberg-ის სავაჭრო სისტემაში.

ლარის გამყარების ძირითად მიზეზებზე და შესაძლო პროგნოზებზე „კომერსანტთან“ საერთაშორისო კვლევებისა და პროგნოზირების ცენტრის ვიცე-პრეზიდენტმა ნიკა შენგელიამ ისაუბრა. მისი თქმით, კურსი როგორც კი 2.60-იან ნიშნულს ჩამოსცდება, ქართული პროდუქციის ექსპორტის შემცირებაა მოსალოდნელი.

„კურსი როგორც კი 2.60-იან ნიშნულს ჩამოსცდება, ქართული პროდუქციის ექსპორტის შემცირებაა მოსალოდნელი. ის რაც ჩვენთან იწარმოება, ანუ ხილი, თხილი და ა.შ ექსპორტზე ვეღარ გავა, რადგან არაკონკურენტუნარიანი გახდება.

ლარის გამყარების ერთ-ერთი უმთავრესი ფაქტორი არის სავალუტო შემოდინებები, რომლებიც გაოთხმაგდა ომის დაწყებიდან. ეს რაც ოფიციალურად საბანკო სისტემით ფიქსირდება, თუმცა ნაღდი სახით, მინიმუმ, ერთი ამდენი იქნება შემოსული ქვეყანაში. ეკონომიკა რადგან საქართველოს ტრანზინტული ქვეყნის ფუნქცია გაიზარდა. 20 ათასამდე ახალი კომპანია გაიხსნა, უძრავ ქონებაზე ტრანზაქციები გააქტიურდა ანუ ეს ხალხი აქ საცხოვრებლად და სამუშაოდ ჩამოვიდა, რამაც ქვეყნის ვალუტა გაამყარა.

კურსის გამყარება, გაგრძელება იქამდე, სანამ საომარი მოქმედება არ დასრულდება და ფულადი გადმორიცხვების მოცულობა არ დაიკლებს. თუ სავალუტო გადმორიცხვები თვეში 130 მლნ დოლარამდე ჩამოვა, მაშინ ლარი გაუფასურდება და პროდუქტები ისევ გაძვირდება“, - ამბობს ნიკა შენგელია.

წლის დასაწყისიდან დღემდე ლარმა პოზიციები დაახლოებით 10 პუნქტით გაიუმჯობესა. თუკი 2023 წლის 1-ელ იანვარს ერთი დოლარი 2.71 ლარი ღირდა, დღეს არსებული ოფიციალური კურსით ის 2.6127 ლარი ღირს, თუმცა ბოლო დღეებია უფრო დაბალი მაჩვენებელია bloomberg-ის სავაჭრო პლატფორმაზე.