რუსეთის წინააღმდეგ ამოქმედებულმა სანქციებმა ქვეყანაში ადგილობრივ წარმოებას პრობლემები შეუქმნა. სხვა კომპანიებთან ერთად მუშაობა გაურკვეველი ვადით ავტოვაზმა იგივე ჟიგულმაც შეაჩერა.  ავტოვაზის წარმომადგენლობა აზერბაიჯანში დაიხურა, საქართველოში კი მხოლოდ ნაშთის გაყიდვები გრძელდება. ახალი ავტომობილები და ნაწილები უკვე ვეღარ შემოდის.

ავტოვაზი 1966 წელს იტალიურ FIAT-თან თანამშრომლობით დაარსდა. ავტომობილები ლადასა და ჟიგულის სახელით იწარმოებოდა, ძირითად ბაზარს საბჭოთა კავშირი და სოციალისტური ბანაკის ქვეყნები წარმოადგენდა, დღესაც გაყიდვების 82% რუსეთზე მოდის.

საწარმომ მუშაობა ჯერ კიდევ მარტის დასაწყისში შეაჩერა და თანამშრომელთა ნაწილი დაითხოვა. რამდენიმე მცდელობის მიუხედავად ფუნქციონირება ვერც შემდგომში განაახლა. ძირითად პრობლემად ნაწილების ნაკლებობა სახელდება. სახარბიელო არც უახლოესი მომავალია. კომპანია ოთხდღიან სამუშაო კვირაზე გადასვლას გეგმავს.

LADA-ს წარმომადგენლობა საქართველოში 2011 წელს გაიხსნა. ყველაზე დაბალფასიანი LADA GRANATA-ს ღირებულება 25 800 ლარიდან იწყება და 31 500 ლარზე ადის, რაც დაახლოებით 8500-10500 აშშ დოლარის ტოლფასია. საუკეთესო შემთხვევაში ეს მოდელი 0-დან 100 კმ/სთ-მდე 10.5 წამში ჩქარდება და 106 ცხენისძალიან ძრავს მაქსიმუმ 184 კმ/სთ-ის განვითარება შეუძლია. ყველაზე ძვირი LADA XRAY-ს ფასი კი 35 500 ლარიდან იწყება და 47 500 ლარზე ადის.

პრობლემების არსებობა კომერსანტთან საუბრისას საქართველოში LADA-ს წარმომადგენლობის დირექტორმა გოჩა როსტიაშვილმაც დაადასტურა. მისი თქმით თანხების გადარიცხვა, ახალი ავტომობილებისა და სათადარიგო ნაწილების მოწოდება შეჩერებულია. იყიდება მხოლოდ ნაშთად დარჩენილი ავტომობილები, თუმცა ტექნიკური მომსახურება ამ დრომდე გრძელდება.

მოსკვიჩზე უკეთესი და ვოლგაზე იაფი ჟიგული საბჭოთა საქართველოში ყველაზე პოპულარულ ავტომობილად ითვლებოდა. რეგიონების ავტოპარკში მათ დღემდე, უკვე არადომინანტური, მაგრამ მაინც მნიშვნელოვანი წილი უკავიათ. საბჭოთა კავშირის დაშლის შემდეგ წარმოებული ჟიგულების რიცხვი კი ძალიან მცირეა და მათ დაბალი ფასის გამო უფრო ხშირად კომპანიები ყიდულობენ.