სოფლის განვითარების პროგრამის მხარდაჭერით, ლაგოდეხის მუნიციპალიტეტში, კომპანია ,,ბიობამბის“ ბიოდეგრადირებადი საწრუპი ჩხირების საწარმო ამოქმედდა. საწარმოს მოსაწყობად საჭირო ინვესტიციის მოცულობამ 150 000 ლარს გადააჭარბა, აქედან სოფლის განვითარების პროგრამის თანადაფინანსება 125,000 ლარი იყო.
სოფლის განვითარების სააგენტოს დირექტორი ილია თამარაშვილი, კახეთის მხარის სახელმწიფო რწმუნებული გიორგი ალადაშვილი, ლაგოდეხის მუნიციპალიტეტის მერი ჯონდო მდივნიშვილი და გაეროს განვითარების პროგრამის (UNDP) პროექტის „სოფლის განვითარების გაუმჯობესება საქართველოში“ მენეჯერი ნოდარ კერესელიძე ახალგახსნილ საწარმოში მიმდინარე სამუშაოებს გაეცნენ.
„სოფლის განვითარების სააგენტო, სხვა სასოფლო-სამეურნეო პროექტებთან ერთად, სოფლის განვითარების პროგრამას ახორციელებს, რომელიც რვა მუნიციპალიტეტში არასასოფლო-სამეურნეო ეკონომიკური საქმიანობის ხელშეწყობას გულისხმობს. პროგრამის ფარგლებში არა ერთი ინიციატივა ფინანსდება. ბიოდეგრადირებადი საწრუპი ჩხირების საწარმოს გახსნა კარგი მაგალითია, თუ როგორ შეიძლება გარემოზე ნეგატიური ზემოქმედების შემცირება“, განაცხადა სოფლის განვითარების სააგენტოს დირექტორმა ილია თამარაშვილმა.
კახეთის მხარის სახელმწიფო რწმუნებულ გიორგი ალადაშვილის განცხადებით საწარმო, რომელშიც პროცესი ეკომეგობრული, ბიოდამზოგველი კომპონენტებით წარიმართება, ერთ-ერთი პირველია არამხოლოდ კახეთის რეგიონში, არამედ საქართველოს მასშტაბით.
„ევროკავშირი და გაეროს განვითარების პროგრამა უკვე მრავალი წელია ხელს უწყობს საქართველოში სოფლად ეკონომიკის დივერსიფიკაციას, დამატებითი შესაძლებლობების შექმნას სოფლად მცხოვრები მოსახლეობისთვის და მეწარმეებისთვის. განსაკუთრებით მნიშვნელოვანია ისეთი პროექტების მხარდაჭერა, რომელიც გარემოსდაცვით კომპონენტებს ითვალისწინებს და ხელს უწყობს ისეთი პრაქტიკის დამკვიდრებას, რომელიც გარემოზე ნაკლებ ზემოქმედებას ახდენს“, განაცხადა გაეროს განვითარების პროგრამის (UNDP) პროექტის „სოფლის განვითარების გაუმჯობესება საქართველოში“ მენეჯერმა ნოდარ კერესელიძემ.
„სოფლის განვითარების პროგრამა“ ქედას, ხულოს, ბორჯომის, ახალქალაქის, თეთრიწყაროს, ყაზბეგის, ლაგოდეხისა და დედოფლისწყაროს მუნიციპალიტეტებში ხორციელდება.
„სოფლის განვითარების პროგრამას“ სოფლის განვითარების სააგენტო (RDA), ევროკავშირისა (EU) და გაეროს განვითარების პროგრამის (UNDP) მხარდაჭერით, „სოფლისა და სოფლის მეურნეობის განვითარების ევროპის სამეზობლო პროგრამის“ (ENPARD) ფარგლებში ახორციელებს.
სოფლის განვითარების პროგრამის ფარგლებში 77 პროექტია დაფინანსებულია, ინვესტიციის ჯამური ღირებულება 11 მლნ ლარს აჭარბებს, თანადაფინანსება — 7.8 მილიონ ლარს აღემატება.