მტკვრის მარჯვენა სანაპიროზე, ლაგუნა ვერესთან რესტორანი აშენდება. შპს „დიონისემ“ თბილისის მერიას კვების ობიექტის პროექტი უკვე შეუთანხმა. კომპანია ახლა მშენებლობის ნებართვას ელოდება.
როგორც „კომერსანტმა“ გაარკვია, პროექტით გათვალისწინებულია არსებული ამორტიზებული კაფეს რეკონსტრუქცია-მოდერნიზაცია. განმარტებითი ბარათის მიხედვით, ტერიტორიაზე გათვალისწინებულია მაქსიმალურად მსუბუქი, გამჭვირვალე, საპარკო პავილიონის ტიპის მოცულობის განთავსება. დოკუმენტში ვკითხულობთ, რომ სარეკონსტრუქციო შენობა არსებული შენობის გაბარიტებს არ ცდება. ირკვევა, რომ არსებული მდგომარეობის გათვალისწინებით, შენარჩუნებული იქნება მიწისპირა სართულზე განთავსებული კონსტრუქციები და სათანადო რეაბილიტაციის შემდგომ მასზე განხორციელდება მსუბუქი კონსტრუქციებით პავილიონის მონტაჟი.
წარმოდგენილი ესკიზური პროექტის მიხედვით, ტერიტორიის არსებული 372,15 კვ.მ განაშენიანება 320,90 კვ.მ-მდე შემცირდება, საიდანაც მხოლოდ 229,76 კვ.მ-ზე განხორციელდება სარეკონსტრუქციო სამუშაოები. ხოლო, ერთსართულიან ნაგებობა, რომელიც ფაქტობრივად საყრდენი კედლის ფუნქციას ასრულებს, გამაგრდება სათანადო რეაბილიტაციით.
ოფიციალურ დოკუმენტში წერია, რომ იგეგმება არსებული 409.55 კვ.მ მწვანე საფრის გაზრდა 578,03 კვ.მ-მდე. სათანადო მკურნალობის შემდეგ შენარჩუნებული იქნება ყველა ნარგავი, რომელსაც კეთილმოწყობის პროექტის შესაბამისად 15-მდე ფიჭვი დაემატება.
აღსანიშნავია, რომ რესტორანი „ვისოლის“ ავტოგასამართი სადგურთან მდებარეობს. რაზეც შპს „დიონისეში“ განმარტავენ, რომ საგანგებო სიტუაციების მართვის სამსახური მიერ მითითებული სახანძრო უსაფრთხოების ტექნიკური რეგლამენტის მოთხოვნების შესაბამისად მოხდა ესკიზური პროექტის კორექტირება. რა დროსაც საპროექტო შენობაში განთავსებული ღიობები 25 მ-იანი მანძილის დაცვით მოეწყო. ასევე აღნიშნავენ, რომ დამატებით მოეწყობა ყრუ ხანძარმედეგი კედელი გაძლიერებული არმირებით.
განმარტებით ბარათში ვკითხულობთ, რომ საპროექტო ობიექტის მიმდებარე განაშენიანება გასული საუკუნის 70-იანი წლებში ჩამოყალიბდა, როდესაც მტკვრის მარჯვენა სანაპიროზე სატრანსპორტო მაგისტრალი აშენდა. შედეგად მდინარე ვერეს შესართავი, რომელიც სატრანსპორტო ტივების მისადგომად გამოიყენებოდა, კალაპოტში მოექცა. ჩატარებული სამუშაოების შემდეგ წარმოქმნილ ჭალაში საწყალოსნოსპორტული კომპლექსი „ლაგუნა ვერე“ განთავსდა. დოკუმენტის მიხედვით, შენობა წარმოადგენს დომინანტ ნაგებობას, რომელიც განაშენიანების ხასიათს და მასშტაბს განსაზღვრავს. იგი წარმოადგენს საბჭოთა მოდერნის თვალსაჩინო ნიმუშს. არქიტექტორებს მიაჩნიათ, რომ საპროექტო შენობა სავსებით მიესადაგება განაშენიანებას. არეალში მოხვედრილი 3-4 სართულიანი სპორტკომპლექსი და სასტუმრო ლაგუნა ვერესთან ერთად ქმნის საბჭოთა პერიოდის სტატიკურ კომპლექსს. მათი ინფორმაციით, ობიექტის დინამიკური ფორმები კლდოვანი ლანდშაფტის, აგურის და მინის ტექსტურის გამოყენებით, არღვევს სტატიკურ გარემოს და უახლოვდება საპარკე ნაგებობის ტიპს.
მომზადებული დოკუმენტის მიხედვით ირკვევა, რომ საპროექტო შენობაზე ასევე ღია ტიპის ტერასა მოეწყობა იგი განპირობებულია მერიის მიერ წახალისებული „მწვანე სახურავის“ კონცეფციით და წარმოადგენს ე.წ. „მეხუთე ფასადს“- საპარკე ნაგებობის ერთ-ერთ მნიშვნელოვან კომპონენტს.