რუსეთის უკრაინაში შეჭრიდან 12 დღეში უკრაინული გრივნა აშშ დოლართან მიმართებაში 3.5%-ით, რუსული რუბლი 70%-ით, ხოლო ლარი 13%-ით გაუფასურდა. ფინანსისტ გოჩა თუთბერიძის განმარტებით, ლარის გაუფასურებაში მნიშვნელოვან როლს ნეგატიური მოლოდინები ასრულებს, შემდგომი პროგნოზირებად დანაკარგის შესამცირებლად კი აუცილებელია საქართველო რუსეთის წინააღმდეგ ამოქმედებულ სანქციებს შეუერთდეს, რაც ქვეყანას პარტნიორებისგან ფინანსური დახმარების მიღების საშუალებას მისცემს.

როგორც გოჩა თუთბერიძემ „კომერსანტთან“ საუბრისას აღნიშნა, დაწესებული სანქციების გამო, ექსპორტი და ფულადი გზავნილები შემცირდება, რადგან რუსეთი ძირითად საექსპორტო ქვეყნად იქცა, ვარდნა სერიოზული იქნება. მისი თქმით, ფსიქოლოგიური ფაქტორების გასანეიტრალებლად ეროვნულმა ბანკმა სავალუტო ინტერვენციებს უნდა მიმართოს, ასევე საჭიროა სებ–მა და მთავრობამ განცხადებებით ბაზარი დაამშვიდონ.

გოჩა თუთბერიძე შექმნილ მძიმე ვითარებაში, რა დროსაც ექსპორტიდან და გზავნილებიდან ფულადი სახსრების შემოდინების კლება და ინფლაციის მატება გარდაუვალია, გამოსავალს რუსეთის წინააღმდეგ დაწესებული სანქციებთან შეერთებაში და შემდგომ დასავლეთიდან მიღებულ ფინანსურ დახმარებაში ხედავს. მისი თქმით, საქართველო რუსეთთან და ბელორუსთან კი არა, ცივილიზებული სამყაროს გვერდით უნდა იდგეს.

საქართველოს პრემიერ–მინისტრმა ირაკლი ღარიბაშვილმა ბოლო ორ კვირაში რამდენჯერმე ხაზგასმით აღნიშნა, რომ საქართველო სანქციებს არ შეუერთდებოდა. მთავრობის მეთაურის მტკიცებით, სანქციები არ მუშაობს.

რუსეთ–უკრაინის ომის დაწყებამდე 1 აშშ დოლარი 3 ლარი ღირდა, დღეს 3.40 ლარი ღირს. საწვავის ფასი რეკორდულ ნიშნულზეა და უახლოეს მომავალში კიდევ მკვეთრი ზრდაა მოსალოდნელი. ეკონომისტები რუსეთისა და უკრაინის საექსპორტო ბაზრის მოკლე დროში ჩანაცვლებას არ ელიან, იმპორტის ჩანაცვლება შესაძლებელია, ოღონდ ის პროდუქტს კიდევ უფრო გააძვირებს. კითხვის ნიშნის ქვეშ დგას ისედაც მიზერულ დონემდე შემცირებული ინვესტიციები, ყველაფერი ეს კი ეკონომიკური ზრდის ტემპს უკეთეს შემთხვევაში შეამცირებს, უარეს შემთხვევაში – მინუსში გაიყვანს.

გიორგი ელიზბარაშვილი