ლარი შედარებით მყარი იქნება მანამ, სანამ რუსეთ-უკრაინის ომი გაგრძელდება — ამის შესახებ „კომერსანტს“ ფინანსისტმა მიხეილ თოქმაზიშვილმა განუცხადა,

მისი თქმით, ლარის გამყარების მთავარი მიზეზი სხვადასხვა არხის მეშვეობით რუსული კაპიტალის საქართველოში შემოსვლაა. თოქმაზიშვილი ფიქრობს, რომ ეს ტენდენცია მომავალშიც გაგრძელდება, სანამ სამეზობლოში მშვიდობა არ აღდგება.

,,ბოლო დღეებია ლარის კურსის დოლართან  გაუფასურების ტენდენცია იკვეთება, თუმცა ბოლო პერიოდი ის გამყარების ტენდენციით ხასიათდებოდა. ლარი შედარებით მყარი იქნება მანამ, სანამ რუსეთ-უკრაინის ომი გაგრძელდება, თუ რა თქმა უნდა, სხვა გარემოებებიც არ დაემატება, მაგალითად, დოლარის გამყარება მსოფლიო ბაზრებზე. თუკი დოლარის გაძლიერებამ ლარის კურსის გამყარებას გადაასწრო, არსებული პროპორცია შეიცვლება.

საუბარია მის 2,60-ნიშნულამდე ჩამოსვლაზე, ჩამოვა თუ არა კურსი, ამაზე წინასწარ საუბარი რთულია. შეიძლება, დღევანდელი გაუფასურება გაჩერდეს ერთ კონკრეტულ ნიშნულზე. 2023 წლის პირველი კვარტალის დინამიკა ბევრ რამეზე იქნება დამოკიდებული, მათ შორის, როგორი ვითარება იქნება რეგიონში. ლარის კურსზე დიდ გავლენას მოახდენს ის, თუ როგორ მოიქცევიან რუსები, დარჩებიან თუ მოძებნიან სხვა გზას და ალტერნატიულ ბაზრებზე გადანაწილდებიან.

ბევრი ქვეყნისთვის ზამთარი მძიმე იქნება. უკვე არაერთი სახელმწიფო აანონსებს, რომ ენერგორესურსებზე მოთხოვნა და ფასიც მოიმატებს. რამდენად გაუძლებს ამ დეფიციტს მსოფლიო, ბევრად არის დამოკიდებული იმაზე, როგორი საფასო პოლიტიკა ჩამოყალიბდება რეგიონში. ასევე მნიშვნელოვანია, რა ნიშნულს მიაღწევს ნავთობის ფასი და როგორ აისახება ისეთ პროცესებზე, როგორიცაა ეკონომიკური აქტივობა, ლარის კურსი და სხვა.“, - ამბობს თოქმაზიშვილი.