საქართველოს ეროვნული ვალუტის გამყარების მთავარი ფაქტორი ტურიზმი და მიგრანტებთან დაკავშირებული სავალუტო შემოდინებების ზრდა იყო, — ამის შესახებ საერთაშორისო სავალუტო ფონდის (IMF) მიერ გამოქვეყნებულ დოკუმენტშია საუბარი.

IMF-ში აღნიშნავენ, რომ ლარი რუსეთ-უკრაინის ომის დაწყების შემდეგ გამყარდა და ეროვნულმა ბანკმა ამის შედეგად სავალუტო რეზერვების გაზრდა შეძლო.

„ლარის დოლართან მიმართებით მკვეთრი გაუფასურების შემდგომ, საქართველოს ეროვნული ვალუტის ნომინალური ეფექტური გაცვლითი კურსი რუსეთ-უკრაინის ომამდელ პერიოდთან შედარებით აშშ დოლართან 17%-ით გამყარდა. ეს ტურიზმით, მიგრანტებთან დაკავშირებული სავალუტო შემოდინებებით და გადმორიცხვებით იყო განპირობებული. ასეთმა პირობებმა საქართველოს ეროვნულ ბანკს მარტი-ოქტომბრის პერიოდში 350 მილიონი დოლარის შესყიდვის შესაძლებლობა მისცა. აღნიშნული ტრანსაქციების შემდეგ, სებ-ის მთლიანი საერთაშორისო რეზერვები 4.4 მილიარდ დოლარამდე გაიზარდა“,- ნათქვამია მიმოხილვაში.

საერთაშორისო სავალუტო ფონდი წელს საქართველოში 10%-იან ეკონომიკურ ზრდას პროგნოზირებს, რაც რუსეთ-უკრაინის ომის შეზღუდულ უარყოფით გავლენას, მზარდ შემოსავლებს ტურიზმიდან, შემომავალი მიგრაციისა და ფინანსური ნაკადებისა და საქართველოს გავლით სატრანზიტო ვაჭრობის ზრდას ასახავს.