2022 წლის აპრილიდან ლარი გამყარების ტრენდს ინარჩუნებს, ხოლო 4 ივნისს ეროვნული ვალუტა აშშ დოლართან მიმართებით 3-ის ნიშნულსაც კი ჩამოცდა. ეროვნული ბანკის მიერ 15 ივლისის ვაჭრობის შედეგად, ლარი აშშ დოლართან მიმართებით 0.55 თეთრით გამყარდა, რის შედეგადაც ერთი დოლარის ოფიციალური ღირებულება 2.8504 ლარი გახდა. ქართული ლარის კურსით ვაჭრობა Bloomberg-ზე კი დღეს 2.8460-სა და 2.8480-ს შორის მერყეობს.

ანალიტიკოსი და ეკონომიკის მეცნიერებათა დოქტორი ნიკა შენგელია „კომერსანტთან“ ამბობს, რომ ლარის გამყარების ტენდენცია ნოემბრამდე შენარჩუნდება, წლის ბოლოს კი შესაძლოა 3-ის ნიშნულს დაუბრუნდეს.

„ლარი გამყარების ტრენდს ინარჩუნებს და ეს ტენდენცია იქამდე გაგრძელდება, სანამ ეროვნული ბანკი ინტერვენციას არ განახორციელებს და ბაზრიდან ლარს არ ამოიღებს. დღეს ეროვნული ვალუტის გამყარების ერთ-ერთი ძირითადი ფაქტორია ემიგრანტების მიერ გადმორიცხული თანხები. ივნისში ემიგრანტებმა 1,5 მილიარდ ლარზე მეტი გადმორიცხეს, მაგრამ ეს მხოლოდ ის თანხაა რაც დაფიქსირდა საბანკო სისტემაში. ჩემი ვარაუდით, უცხოური ვალუტის 70% ხელზე შემოდის და საბანკო არხებში საერთოდ არ ფიქსირდება. მთელი ეს თანხა კი რა თქმა უნდა მიემართება ლარის მოთხოვნაზე, რაც ეროვნული ვალუტის გამყარების ერთ-ერთი ძლიერი ფაქტორია. ვვარაუდობთ, რომ ტენდენცია ნოემბრის შუა რიცხვებამდე გაგრძელდება და წლის ბოლოსთვის შესაძლოა 3-იან ნიშნულსაც კი დაუბრუნდეს“, — ამბობს ნიკა შენგელია.

ნინო თამაზაშვილი