ლარის კურსი სტაბილურობის გარეშე ინფლაცია გაცილებით მაღალი იქნებოდა, - მიიჩნევს საქართველოს დისტრიბუტორთა ბიზნეს ასოციაციის პრეზიდენტი ივა ჭყონია. მისი თქმით, ბოლო პერიოდში ფასების სტაბილურობა სახეზეა, თუმცა რუსეთის ფაქტორის გათვალისწინებით ფქვილზე და ხორბალზე ფასების მატება შეინიშნება.
„ლარის კურსი ასეთ სტაბილური რომ არ ყოფილიყო, ინფლაციის მაჩვენებელი გაცილებით მაღალი იქნებოდა. დამერწმუნეთ ინფლაცია 15-დან 18%-ის ფარგლებში იქნებოდა. ბოლო თვეების განმავლობაში რაც შეიძლება კარგი ვთქვათ, თვიურ ჭრილში ინფლაციის მაჩვენებელი არ არის მაღალი. ბოლო პერიოდში ვხედავთ, რომ საწვავზე ფასები ასე თუ ისე სტაბილურია, იმიტომ რომ თუ ივლისის პერიოდში და აგვისტოს დასაწყისში 4,70 ლარის ფარგლებში იყო დიზელის ფასი დღეს უკვე 4 ლარზეა ჩამოსული. ასევე პირველადი მოხმარების პროდუქტები, რომელიც არის იგივე ზეთზე და ფქვილზე შემიძლია ვისაუბრო, ფასები ქვემოთ იყო წამოსული. სამწუხაროდ ხორბალზე და ფქვილზე ფასების აწევა დაიწყო რის ფასსაც სამწუხაროდ რუსეთი კარნახობს ბაზარს. ეს ძალიან ცუდია. ჩვენ რადგანაც დამოკიდებული ვართ საერთაშორისო ბაზარზე, პირდაპირ პროპორციულად მიბმული ვართ ამ ფასებზე და ინფლაციის მაჩვენებელზე ცალსახად ნეგატიურად აისახება გადაზიდვების ფასის ცვლილება. რადგანაც თუ ევროპიდან 3000-3500 ევროს ფარგლებში იყო 20 ფუთიანი კონტეინერის შემოსვლა დღეს სადღაც 7000-800 ევროს ფარგლებშია. ეს პირდაპირ ურტყამს ფასებს.
თუმცა ბოლო პერიოდის განმავლობაში, მესმის რომ მოსახლეობა ამას ვერ გრძნობს რადგანაც ზაფხულის განმავლობაში ისე სწრაფად აიწია ფასებმა, თუმცა თვიურ ჭრილში, რომ გადავხედოთ ინფლაცია შედარებით სტაბილურია.
ლარი თუ სტაბილურობას შეინარჩუნებს უფრო მეტ ინფლაციას უახლოეს მომავალში არ უნდა ველოდოთ“, - განაცხადა გადაცემაში „ბიზნესი რუსთავი 2-ზე“ ივა ჭყონიამ.
შეგახსენებთ, რომ 2022 წლის სექტემბერში წინა თვესთან შედარებით ინფლაციის დონემ საქართველოში 0.8 პროცენტი, ხოლო წლიური ინფლაციის დონემ 11.5 პროცენტი შეადგინა. რაც შეეხება საბაზო ინფლაციას, აღნიშნულმა მაჩვენებელმა 2022 წლის სექტემბერში, გასული წლის შესაბამის პერიოდთან შედარებით 7.5 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი ასევე 7.5 პროცენტით განისაზღვრა.