კომერსანტის დილის ეთერში, საზოგადოება და ბანკების, ფინანსური განათლების პლატფორმა Edufin - ედუფინისა და კომერსანტის ერთობლივ რუბრიკაში ფინანსური მრჩეველი გიორგი კეპულაძემ ფინანსური განათლების მნიშვნელობის შესახებ ისაუბრა. მისი თქმით, უმჯობესია თუ მოსახლეობა საკონსულტაციო ცენტრს სესხის აღებამდე მიმართავს და მიიღებს რჩევებს.
ფინანსური განათლება მნიშვნელოვანია, ვინაიდან ქვეყნის ეკონომიკას პრობლემას უქმნის მოსახლეობა,რომელსაც არ აქვს ფინანსურ ინსტიტუტებთან ურთიერთობის საჭირო უნარ-ჩვევები. ჩვენს ცენტრთან მომართვიანობა საკმაოდ მაღალია, გვაქვს პროექტი,რომელსაც ვახორციელებთ პარტნიორ გერმანული შემნახველი ბანკების ფონდთან, არსებობს ცხელი ხაზი და საკონსულტაციო ცენტრი, სადაც პროფესიონალი ადამიანი,რომელიც წლები მუშაობდა საბანკო სექტორში, რეკომენდაციას და რჩევებს აძლევს ნებისმიერ პიროვნებას. ამასთანავე, წლის დასაწყისში დავამატეთ ჩვენს მომსახურებას იურიდიული კომპონენტიც, მარიკა არევაძის საადვოკატო ბიუროსთან ერთად. ვისურვებდი,რომ ადამიანებმა წინასწარ მოგვმართონ, სანამ სესხს აიღებენ, როგორც წესი მოსახლეობის 90% მას შემდეგ მოდის ჩვენთან,როცა ვეღარ იხდიან სესხს ან სხვა პრობლემები ექმნებათ,- ამბობს გიორგი კეპულაძე. მან გადაცემაში ასევე ისაუბრა ეროვნული ბანკის მიერ ჩატარებულ კვლევაზე ფინანსურ განათლებასთან დაკავშირებით და აღნიშნა,რომ წინა კველვასთან შედარებით, შედეგები არ შეცვლილა.
საერთაშორისო ორგანიზაციების მხარდაჭერით, ეროვნულმა ბანკმა ჯერ კიდევ, 2016 წელს პირველი კვლევა ჩაატარა ფინანსური განათლების შესახებ. ამ კვლევის საფუძველზე დაიწერა სტრატეგია სახელმწიფო უწყებებისთვის, კერძო სექტორისთვის, არასამთავრობო ორგანიაზციებისთვის. მეორე კვლევა, სულ ახლახან დასრულდა, საბოლოო შედეგები ცნობილი არ არის, თუმცა როგორც ჩემთვისაა ცნობილი, დიდი ცვლილებები არ არის. თუ ფინანსური განათლების საშუალო დონე ასი ქულაა, ჩვენს ქვეყანაში ეს რიცხვი 58,7, ყოველი 100 შესაძლებლობიდან.
გამოკითხულთა დიდმა ნაწილმა იცის, რა არის ინფლაცია და შეუძლია მარტივი პროცენტის გამოთვლა, თუმცა კითხვაზე, რისთვის არსებობს ფული, 93% ამბობს, - იმისთვის რომ დაიხარჯოს. სინამდვილეში, შოვნასთან გვაქვს ხშირად პრობლემა. ფული უნდა დაიხარჯოს, მაგრამ ეს მიუთითებს იმაზე, რომ დაზოგვის კულტურა არ არის განვითარებული და ფულს ვუყურებთ, როგორც ხარჯვის საშუალებას.
ფინანსურად განათლებული მომხმარებელი მომგებიანია ბანკისთვის. ბანკი გაცილებით ნაკლებ რესურსს ხარჯავს პროდუქტის გაყიდვაზე, განათლებულმა მომხმარებელმა იცის, რა პროდუქტს სთავაზობს, რა რისკენთან არის დაკავშირებული ამ პროდუქტით სარგებლობა და ა.შ. დიდი ბანკები აფინანსებენ სხვადასხვა პროექტებს, რომლებიც ხელს უწყობს ფინანსური განათლების ამაღლებას.ფინანსურ განათლებაში და ზოგადად, განათლებაში ჩადებული ინვესტიცია, თუნდაც ეს იყოს საქველმოქმედო და საგრანტო ხარჯები, მომგებიანია მათთვის,- აღნიშნავს გიორგი კეპულაძე. მისი თქმით, ახალი წლის შემდეგ სერიოზულ სავალუტო რყევებს არ უნდა ველოდოთ.
ადამიანის ფსიქოლოგია, ფიქრი და მოლოდინები გავლენას ახდენს ბევრ ეკონომიკურ პროცესზე. ყველას აქვს იმის მოლოდინი,რომ ახალი წლების შემდეგ, კიდევ აიწევს კურსი. უნდა ითქვას,რომ განსაკუთრებულ რყევებს წლის პირველ ნაწილში მაინც და მაინც არ უნდა ველოდოთ. ვისურვოთ, რომ პოზიტიური მოლოდინი გვქონდეს, რაც გავლენას მოახდენს, როგორც ვალუტაზე, ისე ეკონომიკაზე,- განაცხადა გიორგი კეპულაძე.