ლარის გამყარების მიმდინარე ტრენდი ფასების შემცირების წინაპირობა ვერ გახდება. მრავალგზის გაძვირებული პროდუქტის გაიაფებას ფინანსური ბაზრის წარმომადგენლები ჯერჯერობით არ ვარაუდობენ. მათ მოსაზრებას ამყარებს ძვირი საწვავი და ზოგადად, საერთაშორისო ბაზრების ბოლოდროინდელი ტენდენცია, რომელიც მაღალი ფასებით ხასიათდება.

როგორც ანალიტიკოსები ,,კომერსანტთან“ საუბრისას ვარაუდობენ, 2022 წელი ზოგადად მაღალი ფასების ტრენდით იქნება გამორჩეული და ფასები ძირითადად შენარჩუნდება, ზოგ შემთხვევაში, გეზს გაძვირებისკენ აიღებს.

ანალიტიკოს ნიკა შენგელიას პროგნოზით, ფასების კლება მოსალოდნელი არ არის, პირიქით, შეიძლება გაიზარდოს. მისი ვარაუდით, ლარის გამყარების ტენდენცია დიდხანს ვერ გასტანს და სავარაუდოდ მარტიდან გეზს ისევ გაუფასურებისკენ აიღებს.

,,ფასების კლების მოტივაციას ჯერჯერობით ვერ ვხედავთ. პირიქით უფრო ველოდები. ვფიქრობ, წელს ტურიზმი მეტნაკლებად აღიდგენს ძალებს და ტურისტული ნაკადების ზრდის პარალელურად მოთხოვნა გაიზრდება, რაც იმპორტის ზრდის საჭიროებას გამოიწვევს და ფასებზეც აისახება. ლარს მკვეთრი გაუფასურება არ ემუქრება, მაგრამ მომდევნო თვიდან მისი სტაბილურობა შეიძლება შეირყეს. ამდენად, ვერ ვხედავ წინაპირობას, ფასებზე მოხდეს კორექცია კლების მიმართულებით, მით უმეტეს, ნავთობის ფასები  იზრდება, რაც პირდაპირკავშირშია ლოგისტიკასა და სამომხმარებლო ფასებთან“, - ამბობს ,,კომერსანტთან“ ნიკა შენგელია.

ფასების კლებას არც ფინანსისტი გოჩა თუთბერიძე ვარაუდობს.

,,გაძვირებული პროდუქტი ლარის გამყარების პარალელურად ვერ გაიაფდება, ასეთი რამ პრაქტიკულად არ ხდება, ვერც ერთ მსგავს მაგალითს ვერავინ დამისახელებს. აქედან გამომდინარე, არც სურსათის გაიაფების მოლოდინია დადებითი, მით უმეტეს, ნავთობპროდუქტები ძვირდება, რაც სხვა პროდუქტების ფასზეც აისახება. გარდა კურსისა, ბევრი გარემოებაა, რომელსაც სამომხმარებლო ბაზარზე არსებითი გავლენა აქვს“, - ამბობს თუთბერიძე ,,კომერსანტთან“.

შეგახსენებთ, რომ ლარი გამყარებას განაგრძობს, ოთხშაბათს, 9 თებერვალს, თბილისის დროით 10:00 საათისთვის Bloomberg-ის სავაჭრო პლატფორმაზე 1 აშშ დოლარის ღირებულება 2.9 ლარს მიუახლოვდა.

ბოლო 1 წელიწადში ლარი დოლართან მიმართებაში 11%-ით, 1-ლი იანვრიდან დღემდე კი 5.7%-ით გამყარდა.

მარი ჩიტაია