რუსეთ–უკრაინის ომის ფრონტის შავ ზღვაზე გაფართოების შემთხვევაში, ლარსის გამშვები პუნქტის დატვირთულობა მკვეთრად გაიზრდება. როგორც საქართველოს სატრანსპორტო დერეფნის კვლევის ცენტრის დირექტორი პაატა ცაგარეიშვილი აცხადებს, საზღვაო საკონტეინერო ნაკადების შეჩერების შემდეგ, თუკი აქამდე მივა საქმე, ტვირთები ლარსისკენ აიღებს გეზს. საბოლოოდ კი, როგორც ცაგარეიშვილი ასკვნის, არ არის გამორიცხული, სატვირთო-საავტომობილო გადაზიდვებიც შეფერხდეს.
,,ტვირთები, რომელიც უკრაინაში ბორნით მიდიოდა, გარკვეულწილად გადაინაცვლებს ლარსის მიმართულებით. დღესდღეობით არ გვაქვს პრობლემა რუსეთთან, მაგრამ პოლიტიკური ვითარება შეიძლება შეიცვალოს ისე, რომ ლარსის საზღვარიც დაიკეტოს და ამანაც დაამუხრუჭოს ტვირთების მოძრაობა. ამდენად, ომი ირიბად საქართველოზე ძალიან მძიმედ იმოქმედებს. ციფრებში ამის წინასწარ ვარაუდი ძალიან რთულია, როცა არ ვიცით, რამდენ ხანს გასტანს კონფლიქტი. საბორნე მიმართულება ჩვენთვის ძალიან მნიშვნელოვანი იყო, ვინაიდან სასურსათო საკითხების მოგვარებაში დიდ დახმარებას გვიწევდა და საფრთხე ამ მიმართულებითაც შეიძლება გაჩნდეს“, - ამბობს ცაგარეიშვილი ,,კომერსანტთან“.
მან ასევე აღნიშნა, რომ ნებართვების არქონის გამო ისედაც პრობლემაა ლარსის გამშვებ პუნქტზე და ამან შეიძლება უფრო მეტად გაართულოს მდგომარეობა.
,,პორტებზე ტვირთების გაჩერების შემთხვევაში, ავტოსატრანსპორტო საშუალებები გადაინაცვლებენ ლარსის მიმართულებით. ცხადია, ეს ყველაფერი ვარაუდია. თუმცა საზღვო გადაზიდვების ბლოკირება თუ მოხდა, საბორნე ტვირთის ნაწილმა შეიძლება ლარსზე გადმოინაცვლოს. ეს ის ტვირთია, რომელიც საქართველოდან რუსეთში ან უკრაინაში ლარსის გავლითაც მიდიოდა. ისედაც გვიჭირს ნებართვების არქონის გამო და ეს ნაკადები დამატებით ლარსს დააწვება, რასაც ვერც ფიზიკურად გაუძლებს. ამასთან, ნებართვების რაოდენობა მცირეა და ახალი ნაკადებიც რომ დაემატოს, უფრო დეფიციტური გახდება“, - დასძენს პაატა ცაგარეიშვილი.
მისივე ინფორმაციით, არსებული გაანგარიშებით, ზემო ლარსის გამტარუნარიანობა შეადგენს წელიწადში 1.0 - 1.2 მლნ ტონას, ფაქტობრივად კი ატარებს 3,5 – 4,0 მლნ ტონას, რაც წარმოადგენს ტვირთნაკადის მაქსიმალურ (პიკურ) მოცულობას.
ცაგარეიშვილი ასევე აღნიშნავს, რომ საქართველოსა და რუსეთს შორის ტვირთბრუნვას არ აქვს ზრდადი დინამიკა, რაც დასტურდება ბოლო წლებში საქართველო-რუსეთს შორის გაცვლილი საავტომობილო ნებართვების რაოდენობით; ეს მაჩვენებელი ბოლო წლებში არ იზრდება და სტაბილურად 35 000 ერთეულ ნებართვას შეადგენს.
მარი ჩიტაია