ბიზნესი კრედიტებზე ხელმისაწვდომობის ზრდას და კრედიტების გაიაფებას ელის. ბიზნესმენი ლაშა პაპაშვილი ამბობს, რომ საქართველოში კრედიტები ძვირია როგორც ლარში, ასევე დოლარში.
თუ რის ხარჯზე უნდა მოხდეს კრედიტების გაიაფება ბიზნესმენმა გადაცემაში „ბიზნესი რუსთავი 2“-ზე ისაუბრა და განაცხადა, რომ სახელმწიფომ სამიზნე დარგების სუბსიდირება უნდა მოახდინოს.
„შესაძლოა პირდაპირი სუბსიდია იყოს იმ დარგების, რომელიც სახელმწიფოს აინტერესებს. როგორც გააკეთა სოფლის მეურნეობის სექტორში“, განაცხადა პაპაშვილმა და კითხვაზე ემხრობა თუ არა სუბსიდიას, დადებითი პასუხი გასცა.
„რა პრობლემაა? კი სუბსიდიის მომხრე ვარ. მიზნობრივია ყველაფერი, რა სჭირდება ქვეყანას“, -აღნიშნა პაპაშვილმა.
ბიზნესმენი ამბობს, რომ იმისათვის, რომ ბიზნესისთვის სესხებზე ხელმისაწვდომობა გაიზარდოს, ამაზე თავად სებ-მა კომერციულ ბანკებთან ერთად უნდა იმსჯელოს.
„ჩვენ ვერ ჩავერევით ამ საქმეში, კერძო სტრუქტურები არიან. შემოსავლები გაიაფებულია, ვფიქრობ, რომ რაღაცა საშუალებები ბანკებსაც აქვთ, რომ დაწიონ, იმიტომ რომ მათი შემოსავლები იცით რა ნაკადებიც მოდის ჩვენს ქვეყანაში. ეს არამარტო რუსეთის, უკრაინის და ბელარუსის ფულია, ასევეა აზიის ქვეყნების, იგივე ინდური, არაბული ფულიც შემოდის. თუ იაფია ბანკებმა არ უნდა გააძვირონ.
მსოფლიოს აქვს ინფლაციის მაღალი დონე. ჩვენ პატარა ქვეყანა ვართ და საბედნიეროდ ინფლაცია ისე არ მოქმედებს იმიტომ, რომ თუ ეკონომიკას განვავითარებთ ახლა, უნდა ვისარგებლოთ მომენტით. სხვადასხვა ბერკეტი არსებობს ამასთან მუშაობის. ჩვენ ჩვენი უნდა გადავწყვიტოთ. მე მონეტარული პოლიტიკის განაკვეთს დავწევდი და პროცენტს გავაიაფებდი. ამით კი მუხტს მივცემდი ბიზნესის კეთებას. მცირე იქნება თუ დიდი უნდა შევქმნათ პროდუქტი. ჩვენი ეკონომიკური ზრდა არის გადარჩენა ამ წუთას. ვინც გაზრდის ეკონომიკას, ის წამოიღებს ბიზნესს მსოფლიოდან“, - აღნიშნა პაპაშვილმა.
მისი თქმით, უნდა მოხდეს მიწის ზონირება, რადგანაც თუ დღეს სასოფლოს სამეურნეო მიწას ფლობ და ფულს გადაიხდი მარტივად გადაიყვან ურბანულ განვითარებაში. ბიზნესმენი ამბობს, ეს არ უნდა ხდებოდეს. შესაბამისი კანონი არსებობს და ცენტრალური ხელისუფლება უნდა მიეხმაროს რეგიონებს და უთხრან, რომ დაზონონ თავიანთი რაიონები.
„ბოლო 20 წელია ვიძახი, რომ ზონირება უნდა ქვეყანას. იმდენი შემოსული ტურისტია, ინდუსტრიის ზოგიერთმა მიმართულებამ ძალიან დიდი ფული იშოვა, შემოსავალი ნახა და ეს ადამიანები ჩადებენ ისევ ამ ფულს უძრავ ქონებაში. ჩვენს ულამაზეს ქვეყანას, რომ გავუფრთხილდეთ არ არის ზონდირებული მიწა, ანუ სად შეიძლება ურბანული განვითარება, თორემ გაანადგურებენ. ეს უმკაცრესად უნდა გააკონტროლოს სახელმწიფომ, თორემ როგორც თბილისს დაემართა იგივე დაემართება რეგიონებს.
მე ყვარელში მაქვს ბევრი ბიზნესი. ამიტომ ყვარლის გამგეობას უნდა ჰქონდეს საშუალება დაზოგოს თავისი ტერიტორია. და თქვას რომ მე აქ ვენახი მაქვს და არავითარი შენობა აქ არ დაიდგმება. თორემ ისეთი მიქსი იწყება, ახლა უკიდურეს ზონაში ვთქვათ ქინძმარაულში ვიღაცა სახლს აშენებს, ვიღაცა ბეტონის ქარხანას ჩადგამს, ვიღაცა აუზს ჩადგამს. ეს დომხალი ვერ გაჩერდება“, - აღნიშნა ბიზნესმენმა.