ბალტიისპირეთის ქვეყნები და პოლონეთი ეწინააღმდეგებიან ოლიმპიადაში რუსი და ბელარუსი სპორტსმენების ნებისმიერი სახით, თუნდაც ნეიტრალური დროშის ქვეშ მონაწილეობას. ამის შესახებ სამშაბათს ლატვიის საგარეო საქმეთა მინისტრმა განაცხადა. ინფორმაციას უცხოური მედია ავრცელებს.
საერთაშორისო ოლიმპიური კომიტეტმა გასულ კვირას განაცხადა, რომ იკვლევს რუსი სპორტსმენების პარიზის ზაფხულის ოლიმპიადაში მონაწილეობის შესაძლო გზებს და ერთ-ერთ შესაძლო ვარიანტად ნეიტრალური სპორტსმენების სტატუსით მონაწილეობა განიხილება.
ამ განცხადებას დაუყოვნებელი რეაქცია მოჰყვა კიევში, უკრაინის პრეზიდენტის თანაშემწემ საერთაშორისო ოლიმპიური კომიტეტი დაადანაშაულა, როგორც ომის წამახალისებელი.
ლატვიის საგარეო საქმეთა მინისტრმა ედგარს რინკევიჩსმა ტვიტერში დაწერა:
„გადაწყვეტილება, რომ რუს და ბელორუს სპორტსმენებს მომავალ ოლიმპიადაზე ასპარეზობის უფლება მისცენ, ამორალური და არასწორია“. მან მსოფლიოს რუსეთის იზოლაციისკენ მოუწოდა მანამდე, ვიდრე ეს ქვეყანა უკრაინაში შეჭრას განაგრძობს.
„როგორც ყველა ტირანია, ის იყენებს სპორტს პოლიტიკური მიზნებისთვის. საერთაშორისო ოლიმპიური კომიტეტი არ უნდა გახდეს რუსული პროპაგანდისტული მცდელობების თანამონაწილე,“ - განაცხადა რინკევიჩსმა რიგაში ბალტიისპირეთისა და პოლონეთის კოლეგებთან შეხვედრის შემდეგ.
უკრაინა პარიზის ოლიმპიურ თამაშებს ბოიკოტით დაემუქრა, თუ რუსებს მონაწილეობის უფლებას მისცემენ. ბოიკოტის მოწოდებას შეუერთდა ლატვიის ოლიმპიური კომიტეტი.
ლატვია არ მიიღებს მონაწილეობას თამაშებში აგრესორ ქვეყანასთან ერთად, - განუცხადა კომიტეტის პრეზიდენტმა ზორზ ტიკმერსმა ლატვიურ LTV1-ს.
პოლონეთის სპორტის მინისტრმა კამილ ბორტნიჩუკმა გასულ კვირას თქვა, რომ მას ვერ წარმოუდგენია სცენარი, რომელშიც რუსი და ბელორუსი სპორტსმენები მიიღებენ მონაწილეობას ოლიმპიადაში და თქვა, რომ ის არ გამორიცხავს საერთაშორისო ოლიმპიური კომიტეტისთვის ულტიმატუმის დაყენებას.
ბორტნიჩუკმა ასევე განაცხადა, რომ პოლონეთი ორგანიზებას უკეთებს ქვეყნების ეფექტიან კოალიციას, რათა დაბლოკოს მომავალ ოლიმპიადაზე რუსი და ბელარუსი ათლეტების მონაწილეობა.
რაც შეეხება რუსეთის ოლიმპიურ კომიტეტს, მისი ხელმძღვანელი აცხადებს, რომ რუსი სპორტსმენები, სხვა ქვეყნებისგან განსხვავებულ პირობებს არ უნდა დაექვემდებარონ.