ევროკავშირის (EU) გადაწყვეტილებას ყველა ქვეყნის 1435 მმ-იან სარკინიგზო ლიანდაგზე გადასვლასთან დაკავშირებით ბალტიისპირეთის ქვეყნებში კვლავ წინააღმდეგობა ხვდება. როგორც ლატვიის ტრანსპორტის სამინისტროში განაცხადეს, ამის დრო ჯერ არ მოსულა.

ლატვია, ლიეტუვასთან და ესტონეთთან ერთად, ძირითადად იყენებს 1524 მმ-იან სალიანდაგო ხაზებს. ამ ტიპის სარკინიგზო ინფრასტრუქტურა საბჭოთა კავშირიდან არსებობდა და დღემდე გამოიყენება. ლატვიის ტრანსპორტის ახლად დანიშნულმა მინისტრმა, იანის ვიტენბერგსმა განმარტა, რომ გეგმების განსახორციელებლად ევროკავშირისგან მნიშვნელოვანი ფინანსური მხარდაჭერის მოთხოვნის გარდა, 1524 მმ-იანი ლიანდაგის ხაზების აღმოფხვრა შეიძლება იყოს უფრო პრობლემური, ვიდრე სასარგებლო.

„ევროპულ სარკინიგზო ქსელში ინტეგრაციის გადაწყვეტილება მიღებულია ათ წელზე მეტი ხნის წინ, როდესაც გადავწყვიტეთ განგვეხორციელებინა პროექტი Rail Baltica, რადგან ის გულისხმობს ევროკავშირის სტანდარტის სარკინიგზო ლიანდაგის გამოყენებას“,- განაცხადა იანის ვიტენბერგსი.

მან ხაზგასმით აღნიშნა, რომ ევროპულ ლიანდაგზე სრული გადასვლა შეიძლება მილიარდები დაჯდეს და ლატვიის ეკონომიკა ამას მხარს ვერ დაუჭერს, ამასთან ევროკავშირს პროექტის თანადაფინანსების მკაფიო გეგმა არ აქვს.

გარდა ამისა, მინისტრის თქმით, ახალ ტრასაზე გადასვლის შემდეგაც, ძველის ლიკვიდაციაზე საუბარი ნაადრევია.

„ძველ ხაზებზე უარის თქმა ნაადრევია, რადგან უკრაინას იგივე ლიანდაგი აქვს. მე მჯერა, რომ უკრაინაში ომი დასრულდება და ჩვენ შეგვიძლია ვითამაშოთ მნიშვნელოვანი როლი ქვეყნის აღდგენაში. ჩვენი საზღვაო ნავსადგურები და რკინიგზა შეიძლება გამოყენებულ იქნას სამშენებლო მასალების და მრავალი სხვა საქონლის უკრაინაში ტრანსპორტირებისთვის“, - აღნიშნა იანის ვიტენბერგსი.