კოჯორში მდებარე, ლავრენტი ბერიას ცნობილი აგარაკის ბედი უახლოეს მომავალში გადაწყდება. ახლა ინვესტორი ექსპერტიზის დასკვნას ელოდება, რომელმაც შენობა-ნაგებობების მდგრადობის ხარისხი უნდა დაადგინოს. სწორედ ამის შემდეგ გახდება ცნობილი თუ როგორ განავითარებენ რეზიდენციას, რომელიც ზუსტად 120 წლის წინ აშენდა. ობიექტის გასხვისებიდან 6 თვის შემდეგ „იბეროტელის“დირექტორი ივანე ბარბაქაძე ჯერჯერობით ვერ ამბობს, მოხდება თუ არა არქიტექტურულად გამორჩეულ შენობა ნაგებობებისთვის ძველი, ისტორიული იერსახის შენარჩუნება.
„ახლა შენობა-ნაგებობების მდგრადობის ხარისხის დადგენის პროცესში ვართ. პროექტებს არ ვათანხმებთ, ჯერ არ ვიცით რა მიმართულებით ვიმუშავებთ. მოხდება არსებული შენობის გამაგრება თუ ახალ შენობას ავაშენებთ. სამომავლო ფუნქცია და მიმართულება დამოკიდებულია ნაგებობის მდგრადობის ხარისხზე, რომელიც ჩვენთვის ჯერ კიდევ არ არის ნათელი, რადგან ძალიან მძიმე სიტუაცია დაგვხვდა. შენობის ნაწილი დამწვარია, იატაკი აყრილია, მდგომარეობა იმაზე ცუდია, ვიდრე გვეგონა. მაქსიმალურად ვცდილობთ რომ ისტორიული რეზიდენცია შევინარჩუნოთ, გვინდა მაქსიმალურად იყოს გათვალისწინებული საზოგადოებრივი ინტერესი, მაგრამ არ ვიცით ექსპერტიზა რა დასკვნას დაგვიდებს. ჩვენ ყველა ვალდებულება შესრულებული გვაქვს და შეიძლება ითქვას, რომ ობიექტის სრულუფლებიანი მფლობელები ვართ, მაგრამ რა მიმართულებით გაგრძელდება განვითარება, უახლოეს პერიოდში გვეცოდინება“, - განაცხადა „კომერსანტთან“ ივანე ბარბაქაძემ.
შეგახსენებთ, რომ კამპანიის „100 საინვესტიციო შეთავაზება ბიზნესს“ ფარგლებში სახელმწიფომ 22 560 კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული ნაგებობები კოჯორში 2 504 000 ლარად გაასხვისა. კოჯრის მხატვრულ-არქიტექტურულად გამორჩეული აგარაკები 15 აპრილს 2 504 000 ლარად შპს „იბეროტელმა“ იყიდა. 1 კვ.მ მიწის ფასი 110 ლარი გამოდის. აუქციონში მონაწილეობას 3 კომპანია იღებდა, ბიჯების რაოდენობა 434 იყო. კოჯრის გამორჩეული აგარაკის ახალ მფლობელს საინვესტიციო ვალდებულებები არ აქვს, თუმცა აუქციონის აღწერილობაში ვკითხულობთ, რომ საპრივატიზებო ობიექტზე მიმდინარეობს წარმოება კულტურული მემკვიდრეობის უძრავი ძეგლის სტატუსის მინიჭების თაობაზე. შესაბამისად, ინვესტორი ცნობილი შენობების იერსახის შეცვლას, სავარაუდოდ, ვერ შეძლებს.
შენობის საინტერესო ჩუქურთმები და ვიტრაჟული ფანჯრები ყველა გამვლელის ყურადღებას იქცევს. მას ბევრი მითი და ისტორია უკავშირდება. გავრცელებული ინფორმაციით, აგარაკი რუსეთის ბოლო მეფისნაცვლის მოღვაწეობის პერიოდშია აშენებული. ამ შენობაში 1921–24 წლებში რეპრესირებულთა დაობლებული ბავშვების თავშესაფარი იყო. გასაბჭოების შემდეგ კი კოჯორში ყველა შენობა საქალაქო სამმართველოს გადაეცა. მხატვრულ-არქიტექტურულად გამორჩეული ლურჯი შენობა, იმ დროინდელი შინაგან საქმეთა სამინისტროს და უშიშროების საბჭოს აგარაკი იყო. საბჭოთა კავშირის დაშლის შემდეგ ტერიტორიაზე ბავშვთა ბანაკი მოეწყო, მოგვიანებით კი ტერიტორია მიატოვეს და წლების განმავლობაში სახელმწიფო ბალანსზე ირიცხებოდა. შენობას ეს ეტყობა კიდეც - ჩალეწილია ფანჯრები, აყრილია იატაკი, კედლები დამწვარია, სახურავი კი ჩამოშლილია. განადგურებული შენობა ნელ-ნელა პირვანდელ იერსახისაც კარგავს. როგორ განავითარებს ახალი ინვესტორი განადგურებულ ისტორიულ შენობებს, ამას უახლოეს მომავალში გავიგებთ.
ბაჩო ადამია