შეარყია თუ არა კარანტინმა ოჯახების სიმტკიცე? გააჩინა თუ არა კომენდანტის საათმა და თვეების მანძილზე იძულებითმა იზოლაციამ ოჯახებში ისეთი ბზარები, რომ უახლოეს პერიოდში მოსალოდნელია განქორწინებების ეპიდემია? ამ კითხვებზე პასუხების გაცემა საზოგადოებრივი აზრის კვლევის ფრანგულმა ინსტიტუტმა სცადა.
კვლევის შედეგების თანახმად, წყვილების უმრავლესობა ოჯახის ისმტკიცეს ინარჩუნებს, მაგრამ კრიზისმა წყვილების დიდი ნაწილი გამოცდის წინაშე მაინც დააყენა – საფრანგეთში გამოკითხულთა 27% კარანტინის დროს თავის პარტნიორთან გაშორებაზე რეგულარულად ფიქრობდა.
ასეთი აზრები ქალთა 25%–ს, ხოლო მამაკაცთა 28%–ს აწუხებდა.
თუმცა, ეს მაჩვენებელი ბევრად უფრო საგანგაშოა ახალგაზრდებს შორის – 30 წლამდე ასაკში ურთიერთობების გაწყვეტის სურვილი 50%–ს გაუჩნდა, მაშინ, როდესაც 60 წელზე უფროსებში მხოლოდ 14%–ს.
ასევე უარესდება ეს მაჩვენებელი ფინანსური მდგომარეობის მიხედვითაც – მათ შორის, ვისი შემოსავალიც თვეში 900 ევრომდეა, გაშორების სურვილი მამაკაცთა 46% დს ქალთა 35%–ს გაუჩნდა. გაცილებით დაბალია ეს მონაცემები მათ შორის, ვისი შემოსავალიც 2500 ევროდან იწყება – 21% და 23% შესაბამისად.
პარტნიორის შეცლის სურვილი ასევე მეტად შეიმჩნევა დიდ მეგაპოლისებში, სადაც მოსახლეობა პროვინციასთან შედარებით ბევრად უფრო მჭიდროდ ცხოვრობს.
კვლევის თანახმად, ურთიერთობების გაუარესების 3 ძირითადი ფაქტორია: იზოლირება, სამსახურთან დაკავშირებული სტრესები და სექსუალური ცხოვრების ერთფეროვნება. ეს ფაქტორები დაასახელეს როგორც ქალებმა, ასევე მამაკაცებმაც, თუმცა, პრიორიტეტები მაინც განსხვავებულია – იზოლირება და მასთან დაკავშირებული ურთიერთობების დეფიციტი პირველ რიგში ქალთა 70%–ს და მამაკაცთა 54% აწუხებს.
კარანტინი დასრულდა, კომენდანტის საათი გაუქმდა, ნორმალურთან მიახლოვებული ცხოვრება აღდგა, მაგრამ ხშირ შემთხვევაში გაჩენილი ბზარი არსად გამქრალა – კრიზისი შემდეგ წყვილთა 12%–მა განაცხადა, რომ ძველი ურთიერთობების აღდგენას ცდილობს, მაგრამ ვერ ახერხებს, 4%–მა კი გაშორება მტკიცედ გადაწყვიტა.
კვლევის ავტორის ფრანსუა კრაუსის თქმით, ეს მაჩვენებლები გაცილებით ფრო მაღალი იქნებოდა, რომ არა გაშორებასთან დაკავშირებული შიშები – მათ შორის ისეთ პრაქტიკულ საკითხებში, როგორებიცაა საცხოვრებელი ადგილი, სკოლა შვილებისთვის და ფინანსური მდგომარეობა, რომელიც, როგორც წესი, მეუღლეების და პარტნიორების გაშორების შემდეგ უარესდება.
„ვერ ვიტყვით, რომ გაშორებების ბუმი გველის, თუმცა, სავარაუდოდ, წყვილების გაყრის რაოდენობა მნიშვნელოვნად გაიზრდება“, – თვლის კრაუსი.
lefigaro.fr