სომხეთის პრემიერ-მინისტრი ნიკოლ ფაშინიანი ასეთ შთამბეჭდავ გამარჯვებას ალბათ თავადაც არ ელოდა - მისმა პარტიამ 20 ივნისს გამართული ვადამდელი საპარლამენტო არჩევნები დამაჯერებლად მოიგო და ამომრჩეველთა ხმების 53,9% მიიღო.

ყოფილი ჟურნალისტი, რომელიც ხელისუფლებაში 2018 წლის მშვიდობიანი რევოლუციით მოვიდა, ამჯერად არა „ხავერდოვან“, არამედ ფოლადის რევოლუციაზე საუბრობს.

„მანდატი, რომელიც ჩვენ მივიღეთ, ნიშნავს კანონის და სამართლის დიქტატურას და ჩვენ ხალხის ნება უნდა აღვასრულოთ“  - განაცხადა ფაშინიანიმა კენჭისყრის შედეგების გამოცხადების შემდეგ,

მისი მთავარი ოპონენტი და მტერი რობერტ კოჩარიანი მნიშვნელოვნად ჩამორჩება - მან ხმათა მხოლოდ 21,04% მიიღო.

1998-2008 წლებში სომხეთის პრეზიდენტმა და ვლადიმირ პუტინის პირადმა მეგობარმა კოჩარიანმა „არჩევნების შედეგების მიზანმიმართული გაყალბება“ დაგმო და დარღვევების საფუძვლიანი შესწავლა მოითხოვა.

„მანამ, სანამ ყველა ეჭვები არ გაიფანტება, ჩვენი ბლოკი არჩევნების შედეგებს არ აღიარებს“, - განაცხადა მან.

ვადამდელ არჩევნებში, რომელიც სომხეთში აზერბაიჯანთან ომში მარცხის შემდეგ დაინიშნა, მონაწილეობა ამომრჩეველთა 49%-მა მიიღო. ახალი გამარჯვება არჩევნებში ფაშინიანს და მის პარტიას ახალ ლეგიტიმურობას ანიჭებს.

ეს იყო არჩევანი ცუდს და უარესს შორის - ამან კი შედეგები ბევრად უფრო არაპროგნოზირებადი გახადა.

„ჩვენ ძალიან მძიმე პერიოდი გავიარეთ და არ არსებობს ადამიანი, რომელსაც მე ვენდობი“, - ამბობს 36 წლის ერევნელი ლუსინე, რომელმაც ხმა ფაშინიანს მისცა.

მისი თქმით, ეს არჩევანი არა იმდენად ფაშინიანის სასარგებლოდ, არამედ კოჩარიანის საწინაამღდეგო იყო.

„ძველი ხელისუფლების დაბრუნება ადამიანებს იმდენად აშინებთ, რომ მათ ხმა ფაშინიანს მისცეს, რომელსაც არაკომპეტენტურ მაგრამ პატიოსან ადამიანად მიიჩნევენ“, - ამბობს ლას-ვეგასის უნივერსიტეტის პროფესორი ნერსეს კარაპეტიანი.

ნიკოლ ფაშინიამნა საპარლამენტო არჩევნები 2018 წელს მოიგო - მაშინ მან ხმათა 70% დააგროვა, თუმცა ამომრჩეველთა მნიშვნელოვანი ნაწილის სიპმატიები მან უკვე დაკარგა.

„ის თავის ხალხს ომის დროს ატყუებდა, გამარჯვებას გვპირდებოდა, შემდეგ კი ერთ ღამეში ხელი კაპიტულაციას მოაწერა“, - მიიჩნევს 36 წლის არსენ ხანამირიანი, რომელმაც თავის დროზე მხარი „ხავედროვან რევოლუციას“ დაუჭირა, დღეს კი ხმა რობერტ კოჩარიანს მისცა.

ის რობერტ კოჩარიანს კეთილშობილების სიმბოლოდ არ მიიჩნევს, თუმცა, უპირატესობას „რაციონალურ მიდგომას“ ანიჭებს.

„რა თქმა უნდა, მაწუხებს, რომ კოჩარიანის მოსვლით ჩვენ შესაძლოა დიქტატურაში აღმოვჩნდეთ, მაგრამ ანარქია უფრო მეტად მაშინებს“, - თვლის ის.

სომხური საზოგადოება, რომელიც სამხედრო მარცხს მძიმედ განიცდის და ამავე დროს მწვავე ეკონომიკური კრიზისის მდგომარეობაშია, ასეთი პოლარიზებული არასდროს ყოფილა.

წყარო: lemonde.fr