ბევრი ფინელი, როგორც რიგითი თანამშრომელი, ასევე ხელმძღვანელი დისტანციური მუშაობის გამოცდილებით ძალიან კმაყოფილია და ქვეყანა ამ პრაქტიკას პანდემიის დასრულების შემდეგაც გააგრძელებს.

როგორც მინიმუმ 1 მლნ. ფინელი, ანუ, დასაქმებულთა 50%, 2020 წლის მარტში დისტანციურ მუშაობაზე გადავიდა, ეს ერთ-ერთი ყველაზე მაღალი მაჩვენებელია ევროპაში და ამავე დროს 5,5-მლინ -იანი ქვეყნის კორონავირუსთან წარმატებული გამკლავების მთავარი საიდუმლო.

ფინეთში დაინფიცირების და სიკვდილიანობის დონე ერთ-ერთი ყველაზე დაბალია მსოფლიოში, თანაც ქვეყნის ეკონომიკური ვარდნა მხოლოდ 3,2%-ს შეადგენს.

უძრავი ქონების მართვის კომპანიის ფინანსური დირექტორი იოჰანა ხოლმსტრემი გასული წლის შედეგებს აჯამებს:

„ცოტათი მენატრებიან ჩემი კოლეგები. ზოგჯერ ვცდილობთ ერთმანეთს შევხვდეთ, თუმცა აქ ფინეთში, ადამიანები ნაკლებად კონტაქტურები არიან“ - ამბობს ის.

თუმცა, რაც შეეხება პრაქტიკულ მხარეს ის ძალიან კმაყოფილია.

„დისტანციის  პირობებში ეფექტურობა არათუ შემცირდა საოფისე მუშაობასთან შედარებით, არამედ გაიზარდა. აქ ხელს არავინ მიშლის და მეტი თვითორგანიზება ჩემი შეხედულებებისამებრ შემიძლია. ზოგჯერ კრებებს პარკში გასეირნების დროს ვატარებ“ - ამბობს ის.

იოხანა ერთადერთი არ არის, ვისაც დისტანციური მუშაობა მოეწონა. ჰელსინკის უნივერსიტეტის მიერ ჩატარებული კვლევის თანახმად, გამოკითხულ 1164 თანამშრომელთა შორის 85% დისტანციურად შრომით ძალიან კმაყოფილი იყო.

„ადამიანები გრძნობენ, რომ მათი შრომა უფრო ეფექტური და პროდუქტიული გახდა, ამავე დროს ბალანსი მუშაობას და პირად ცხოვრებას შორის გაუმჯობესდა“ - ამბობს კვლევის ხელმძღვანელი, პროფესორი კირიმარია ბლომკვისტი.

ბოლო ათწლეულების მანძილზე სამუშაო ძალის სტრუქტურა მნიშვნელოვნად შეიცვალა.

„საოფისე თანამშრომლების რაოდენობა გაიზარდა, ხოლო წარმოებაში ჩართული მუშახელი შემცირდა. შესაბამისად, იმ დარგების რაოდენობა, სადაც შესაძლებელია დისტანციურად მუშაობა, გაცილებით მეტია, ვიდრე 15- 20 წლის წინ. თანაც ეს სრული ინტერნეტიზაციის პირობებში“ - ამბობს დასაქმების დარგში ეკონომიკის სამინისტროს ექსპერტი ტარია კრეგერი.

ამას ასევე ემატება საზოგადოებაში ურთიერთნდობის მაღალი ხარისხი, რაც დისტანციური შრომისთვის ერთ-ერთი აუცილებელი პირობაა.

სამედიცინო აღჭურვილობის მწარმოებელი კომპანიის მენეჯერი ხელი ტოლორნენი ამბობს, რომ უფროსობა მას არ აკონტროლებს.

„მათ არ აინტერესებთ, ვარ მე ოფისში, თუ სახლიდან ვმუშაობ, მათთვის მთავარია საბოლოო შედეგი“ - განაცხადა მან.

კომპანია Fortum Energy Group-ის ვიცე-პრეზიდენტის ანუ ლეხტოს თქმით, პანდემიამ ტოპ-მენეჯერებს ახალი უნარ-ჩვევები შესძინა.

„პანდემიამ კომუნიკაციების და აზრის ზუსტად ჩამოყალიბების მნიშვნელობა გაზარდა - გუნდების ხელმძღვანელობა ოფისში და დისტანციაზე ერთი და იგივე არაა. ახალ პირობებში მნიშვნელოვანია მკვეთრი და კონკრეტული ამოცანების დაყენებაა. ჩვენ ეს კარგად მოვახერხეთ და პანდემიის დასრულების შემდეგ შევეცდებით დისტანციაზე რაც შეიძლება მეტი ადამიანი დავტოვოთ“  - ამბობს ის.

თუმცა, კიდევ ერთი გამოწვევაც არის. დისტანცირება კარგია ინდივიდუალური შრომისთვის, მაგრამ არა ინოვაციური და შემოქმედებითი საქმიანობის დროს.

„შემოქმედება კოლექტიური შრომის პროდუქტია და მას ჩაკეტილობა არ უყვარს. ამ თემაზე ბიზნესი უკვე მუშაობს და საბოლოოდ, პანდემიის დასრულების შემდეგ, იქნება არა მექანიკური დაბრუნება უკან, არამედ ჰიბრიდულ ფორმაზე გადასვლა, როდესაც დისტანციური მუშაობა საოფისესთან შეთავსდება“, - თვლის პროფესორი ბლუმკვისტი.

წყარო:lemonde.fr