“საქართველოს ფინანსური სისტემა და კონკრეტულად საბანკო სისტემა ინტეგრირებულია მსოფლიოს ფინანსურ და დასავლურ ფინანსურ სისტემაში, ამიტომ ლეგალურად ჩვენ დე ფაქტო ვართ სანქციებში, ამიტომ ჩვენ ვერ გადავუხვევთ და ამ სისტემის წინააღმდეგ, რომც მოვინდომოთ ვერ წავალთ.“ - ამის შესახებ რადიო „კომერსანტის“ ეთერში, გიორგი აბაშიშვილის საავტორო გადაცემაში „ბიზნესინსაიდერი“ ეროვნული ბანკის საბჭოს ყოფილმა წევრმა და პროფესორმა ნიკოლოზ ყაველაშვილმა განაცხადა. მისი თქმით საქართველოს ბანკები ძალიან დიდი ლუპის ქვეშ არიან და ყოველგვარ რეგულაციებს ექვემდებარებიან. შესაბამისად ყაველაშვილის თქმით, ლეგალურად ძალიან ძნელია , რომ სანქციების ნაწილი არ იყო.
“არსებობს ჩრდილოვანი ბიზნესი და ჩრდილოვანი ეკონომიკა და აქ უკვე საერთოდ რამის შეფასება ძალიან ძნელია და ამას დიდი კვლევა უნდა, ლაპარაკი შეიძლება ბევრი, ალბათ ჩრდილოვანი ეკონომიკა არსებობს და გარკვეული გავლენა აქვს, მაგრამ რამდენად დიდი გავლენა აქვს და აქ სანქციები როგორ იმუშავებს, ამაზე საუბარი რეალურად ძალიან რთულია, მაგრამ ფაქტია, რომ ალბათ არსებობს, მაგრამ რა წილია ეკონომიკის, რა გავლენა აქვს, სანქციების შემოვლაზე როგორ შეიძლება გამოიყენო ეს უკვე ძალიან რთული თემაა“. - აღნიშნა ნიკოლოზ ყაველაშვილმა.
ყაველაშვილმა საქართველოში რუსეთიდან ფულის შემოსვლაზეც ისაუბრა და აღნიშნა, რომ რუსეთიდან ლეგალურად ფული შემოდის გადმორიცხვებით და ასევე არარეგისტრირებული ფულიც შემოდის რუსეთიდან, მისივე თქმით არის რაღაც თანხები, რომელსაც უბრალოდ ვერ შეამოწმებ, მაგალითად ვიღაცას ჯიბეში უდევს თანხა და დახარჯავს და ა.შ.
„მეორე ფაქტორია ვაჭრობა, რუსეთი მსხვილი სავაჭრო პარტნიორია, არა ერთადერთი, მაგრამ საკმაო გავლენა ააქვს, იგივე გავლენა აქვს უკრაინასაც. სხვათა შორის რუბლი გამყარდა, გამყარდა იმიტომ რომ შემცირდა ვაჭრობა, აღარ შედის არაფერი, ძალიან ბევრი საქონელი დასანქცირებულია, შესაბამისად შემცირდა დოლარზე მოთხოვნა“. - აღნიშნა ნიკოლოზ ყაველაშვილმა.
თაკო კვაჭანტირაძე