საბავშვო კონსტრუქციების დანიური კომპანია, Lego შეერთებულ შტატებში თავისი სათამაშოების ახალი საწარმოო ქარხნის მშენებლობაში მილიარდ დოლარზე მეტ ინვესტიციას განახორციელებს. ამის შესახებ Reuters-ს კომპანიის აღმასრულებელმა დირექტორმა, კარსტენ რასმუსენმა განუცხადა.

ქარხნის პროექტი ნახშირბადნეიტრალურია და მისი აშენება ვირჯინიის შტატის ჩესტერფილდის ოლქში იგეგმება. კომპანიისთვის ვირჯინიის ქარხანა მსოფლიოში მეშვიდე, ხოლო ნახშირბადნეიტრალურობისა და მზის ენერგიაზე მუშაობის მხრივ, მეორე საწარმოო იქნება. პირველი ასეთი ქარხნის ვიეტნამში აშენების გეგმა Lego-მ 2021 წლის დეკემბრის დასაწყისში წარადგინა, რაც, ასევე, მილიარდ დოლარზე მეტ ინვესტიციას საჭიროებს. მისი აშენება 2024 წელს იგეგმება.

კარსტენ რასმუსენის თქმით, 10 წელზე გათვლილი Lego-ს ახალი სტრატეგია საწარმოო ობიექტების საკვანძო ბაზრებთან ახლოს განლაგებას ითვალისწინეს, რაც მომგებიანია, რადგან გლობალური ვაჭრობა მიწოდების ჯაჭვის პანდემიისდროინდელ შეფერხებებს კვლავ განიცდის.

კომპანიაში აცხადებენ, რომ მომავალ ქარხანას ენერგია განახლებადი წყაროებიდან, მზის ადგილობრივი სიმძლავრეებით მიეწოდება. Lego-მ პირობა დადო, რომ 2020-იანი წლების ბოლოსთვის სათამაშო პლასტმასის აგურების წარმოებაში ნავთობზე დაფუძნებულ მასალას მთლიანად მდგრადი მასალით ჩაანაცვლებს. აშშ-ის 100 მაღაზიაში კომპანიას ამჟამად, დაახლოებით, 2600 ადამიანი ჰყავს დასაქმებული.

160 000 კვ.მ ფართობის ქარხანა ექსპლუატაციაში 2025 წლის მეორე ნახევარში შევა. მასში 1760-ზე მეტი ადამიანი დასაქმდება.

2006 წელს Lego-მ კონექტიკუტში პატარა ქარხანა დახურა, რის შემდეგაც აშშ-ში პროდუქციის მიწოდება კომპანიის მექსიკის ქარხნიდან ხდება.

2021 წელს დანიურმა კომპანიამ სათამაშოების წარმოების საუკეთესო ზრდის ტემპი გამოავლინა და გაყიდვები 27%-ით გაზარდა, რამაც 55,3 მლრდ დანიური კრონი (7,8 მლრდ დოლარი) შეადგინა. კომპანია, ასევე, ევროპისა და ჩინეთის ქარხნებში სიმძლავრეების გაზრდისთვის ინვესტიციებს დებს. მთელ მსოფლიოში Lego წელიწადში, დაახლოებით, 100 მილიარდ სათამაშო პლასტმასის აგურს აწარმოებს, რაზეც 24000 ადამიანი ჰყავს დასაქმებული.

bpn.ge