მსოფლიოში ცნობილმა და ყველა ბავშვისათვის საყვარელმა სათამაშოების მწარმოებელმა დანიურმა კომპანია LEGO-მ გადაწყვიტა სათამაშოების კონსტრუქციის მსგავსი ავეჯი დაემზადებინა.

კომპანია LEGO Group-მა ავეჯი ასევე დანიურ ბრენდ Room Copenhangen-თან ერთად დაამზადა. ავეჯის უჩვეულო და საინტერესო კოლექციაში ნახავთ ისეთ ყოველდღიურ ნივთებს, როგორებიცაა სურათის ჩარჩოები, წიგნების კარადები, საწერი მაგიდები, კომოდები და სხვა.

თითოეულ ნივთს LEGO-სთვის დამახასიათებელი ვიზუალი და ფორმები აქვს, რაც მათ განსაკუთრებულ იერს სძენს.

კომპანიის წარმომადგენლების თქმით, მათი მიზანი იყო საზოგადოების რეაქცია შეემოწმებინათ და დაკვირვებოდნენ რამდენად მოუნდებოდათ ადამიანებს მსგავსი სახის ავეჯის ყიდვა. როგორც სტატიაშია ნათქვამი, ავეჯი ამ ეტაპზე ძირითადად ბავშვებისთვისაა განკუთვნილი და მათთვის განსაკუთრებით სასიამოვნო იქნება ოთახის ცნობილი ფიგურების მიხედვით მოწყობა.

მათი თქმით, თუ საზოგადოების ინტერესი დიდი იქნება, შესაძლოა, მომავალში მსგავსი ტიპის ავეჯის წარმოება მასობრივად დაიწყონ.

კომპანიის ვებ-გვერდზე განთავსებული ინფორმაციის მიხედვით, ავეჯი ეკოლოგიურად სუფთაა და ჯანმრთელობისთვის საშიშ ნივთიერებებს არ შეიცავს.

რაც შეეხება ფასებს, ისინი ბრენდიდან გამომდინარე საკმაოდ მაღალია. მაგალითად, კარადის ფასი 265 დოლარია, სურათის ჩარჩო კი, 90 დოლარი ღირს.

კომპანია „ლეგო“ დანიის ქალაქ ბილუნდში 1930-იან წლებში დაარსდა. დღემდე კომპანიამ საერთო ჯამში 600 მილიარდზე მეტი კუბი დაამზადა.

წყარო: ბიზნესპრესნიუსი