ახლახანს, სოციალური ქსელით, ლერი სულბერიძის ადვოკატი, ირმა ჭკადუა, „ბანკები და ფინანსებს“ გამოეხმაურა. გამოხმაურებას უცვლელად გთავაზობთ:
„ბანკები და ფინანსები“-ს მიერ მომზადებული სტატია, სათაურით: „ვის ეკუთვნის წყნეთის სახლი, სადაც იმალებოდნენ ნიკო კვარაცხელიას მკვლელობაში ბრალდებულები და უკავშირდება თუ არა, ძებნილთა ხელშეწყობას ლერი სულაბერიძის სახელი“ – არ წარმოადგენს სიმართლეს. ისტორია გამოგონილი, მიზანი კი ლერი სულაბერიძის ოჯახის და მისის საქმიანი რეპუტაციის შელახვაა.
გვსურს პირველ რიგში ჩვენი ოჯახის სახელით სამძიმარი გამოუცხადოთ ნიკა კვარაცხელიას ოჯახს, განვიცდით და შეძრულები ვართ მოხდარი ტრაგედიით . ფაქტია, ამ სტატიის სამიზნე იყო ლერი სულაბერიძე და მისი ოჯახი, გვსურს კატეგორიულად განვაცხადოთ, რომ ამ ინფორმაციის მომწოდებელი წყარო, არის დაინტერესებული მხარე. ამის თქმის საფუძველს გვაძლევს თავად სტატია და მისი შინაარსი.
თვალში საცემია ერთი დეტალი, კერძოდ, ასეთი მძიმე ტრაგედიის ფონზე დინამო თბილისთან 23 წლიანი სამართლებრივი დავის მიმოხილვა მინიმუმ უხერხულია? შეუძლებელია, ამ სტანდარტითა და მიდგომით, საზოგადოებას მედიამ მიაწოდოს მიუკერძოვებელი და ზუსტი ინფორმაცია.
ლერი სულაბერიძე და მისი იურისტები კატეგორიულად უარვყობთ რაიმე კავშირს წყნეთში დაკავებულ ძებნილებთან და შესაბამისად დაუყონებლივ მოვითხოვთ ამ გამოგონილი ისტორიის უარყოფას რედაქციისგან“, – ნათქვამია ირმა ჭკადუას გამოხმაურებაში.
რედაქციის სახელით, გვინდა აღვნიშნოთ, რომ მივესალმებით ყველა იმ გამოხმაურებას, რომელიც თავისი შინაარსით ემსახურება სიცხადის შეტანას ერთი თვის წინ მომხდარი საზარელი დანაშაულის სავარაუდო მონაწილეების შეფარება/დახმარების საქმეში.
მივესალმებით ასევე ადვოკატ ირმა ჭკადუას გამოხმაურებას, განსაკუთრებით იმ ნაწილში, სადაც იურისტები კატეგორიულად უარყოფენ ლერი სულაბერიძის ან/და მისი ოჯახის რაიმე კავშირს დაკავებულ ძებნილებთან და ამ განცხადების შემდგომ არ გვაქვს საფუძველი, მის შინაარსს არ ვენდოთ.
შესაბამისად, გვინდა ბატონი სულაბერიძის ოჯახის ინტერესების დამცველთა საყურადღებოდ ვთქვათ, რომ არც ზოგადად და არც ამ კონკრეტულ შემთხვევაში, არ არის ჩვენი მედია-პლატფორმის ინტერესი, ვინმესთვის რაიმე სახის ზიანის მიყენება. ჩვენს მიერ განთავსებული მასალის შინაარსი, მოცემული ვერსია, რომელიც ცხადია, დაფუძნებულია წყაროს მიერ მოწოდებულ ინფორმაციაზე, სრულად არის აგებული მთელ რიგ ფაქტობრივ გარემოებებზე და მათგან გამომდინარე გონივრულ ვარაუდსა და ანალიზზე. იქ მტკიცებით ფორმაში გამოთქმულ მოსაზრებას (გარდა ფაქტობრივი გარემოებებისა), ბუნებრივია, ვერ ნახავთ.
ისიც ბუნებრივია, რომ აღნიშნული საზარელი დანაშაული და მასთან დაკავშირებული ნებისმიერი სიახლე კიდევ დიდხანს იქნება საზოგადოების ყურადღების ცენტრში და აქედან გამომდინარე, დარჩება მედიის დაკვირვების სფეროშიც.
კიდევ ერთხელ მადლობას ვუხდით ქალბატონ ირმას გამოხმაურებისთვის და კიდევ ერთხელ აღვნიშნავთ, რომ მოცემულ პუბლიკაციას არ ჰქონია მიზნად ვინმეს, მათ შორის, მისი კლიენტის, ბატონი სულაბერიძის და მისი ოჯახის ინტერესების და საქმიანი რეპუტაციის შელახვა.
ადვოკატი
