ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი გერმანული „ბოკ ჰოლდინგის“ დირექტორს დიტრიხ ბოკს და მის თანხმლებ პირებს შეხვდა, სადაც გერმანული ჰოლდინგის მიერ საქართველოში დაგეგმილი სამომავლო ბიზნესპროექტები განიხილეს. ინფორმაციას ეკონომიკის სამინისტრო ავრცელებს.

შეხვედრაში ასევე მონაწილეობდა სააგენტოს „აწარმოე საქართველოში“ დირექტორი მიხეილ ხიდურელი.

შეხვედრაზე აღინიშნა, რომ „ბოკ ჰილდინგი“, რომელიც პროდუქციას აწვდის ისეთ ბრენდებს, როგორიცაა „ჰუგო ბოსი“, „მარკ ო'პოლო“, საქართველოში, კერძოდ, ქუთაისის ინდუსტრიულ ზონაში სამკერვალო საწარმოს გახსნას და საწყის ეტაპზე 350 ადამიანის დასაქმებას გეგმავს. ეს მაჩვენებელი პროექტის განვითარების პარალელურად, 1500 - მდე გაიზრდება.

დიტრიხ ბოკის განცხადებით, ჰოლდინგი ფუნქციონირებს ასევე უკრაინაში, იტალიაში, ბულგარეთში, რუმინეთში და აქვთ დაინტერესება, ბიზნესი საქართველოშიც განახორციელონ. „თქვენ ქვეყანაში ძალიან კარგი პირობები დაგვხვდა. ჩვენ მოგვწონს საქართველო და, შესაბამისად, აქ ინვესტირებას ვფიქრობთ,“ - აღნიშნა მან.

„საქართველოში ისეთი კომპანიების შემოყვანა, როგორიცაა „ბოკ ჰოლდინგი“, განსაკუთრებით საინტერესოა დასაქმების გაზრდის კუთხით. ინვესტორებთან მუშაობისას, ყოველთვის, ჩვენი მთავარი ამოცანა უნდა იყოს რაც შეიძლება მეტი დასაქმება საუკეთესო პირობებით, რათა ჩვენი მოსახლეობის შემოსავლები გაიზარდოს. ვფიქრობ, ეს იქნება მორიგი წარმატებული ინვესტიცია, რომელიც ქუთაისის ეკონომიკას ხელს შეუწყობს,“ - განაცხადა შეხვედრის დასრულების შემდეგ ლევან დავითაშვილმა.