კონკრეტულ ფარმაცევტულ პროდუქტებზე შესაბამისი ზღვრული საბითუმო სარეალიზაციო ფასის დადგენის უფლება ამიერიდან ფარმაცევტული პროდუქტის ფასების რეგულირების უწყებათაშორის კომისიას აქვს.
როგორც ბიზნეს-კონსულტანტმა ლევან კობერიძემ „კომერსანტთან“ საუბრისას განაცხადა, ის მიესალმება რეფერენტული ფასების დაწესებას, თუმცა საბაზრო ეკონომიკის პირობებში ხელისუფლების ჩარევა მინიმალიზირებული უნდა იყოს და ფასების რეგულირება კონკურენციის გათვალისწინებით უნდა მოხდეს,
„მოსახლეობის ინტერესი უნდა იყოს უმთავრესი, მათ შორის მედიკამენტების ფასებზე ისეთი ხელმისაწვდომობა, რომ მოსახლეობას არ გაუჭირდეს ჯანმრთელობაზე ზრუნვის ისეთ კომპონენტში, რასაც ჰქვია ფარმაცევტული პროდუქციის შეძენა.
მიუხედავად იმისა, რომ გარკვეულ მედიკამენტებზე რეფერენტული ფასების დაწესებას სწორ გადაწყვეტილებად ვთვლი, სახელმწიფო სტრუქტურებიდან მთლიანად ბაზარზე ასეთი ტოტალური, ან მნიშვნელოვანი ჩარევის ალტერნატივად და უფრო ეფექტიან ზომად მიმაჩნია კონკურენციის გაძლიერება თვითონ კომპანიებს შორის. აი, აქ უნდა შევუწყოთ ხელი მთავრობამ და პარლამენტმა იმ გამართული კანონმდებლობის შექმნით და მერე მისი აღსრულებით, რომელიც სამწუხაროდ ბოლო 3 წლის განმავლობაში რეგრესს განიცდის და კონკურენციის გაძლიერების ნაცვლად აძლიერებს ოლიგოპოლიას და ხშირ შემთხვევაში უპირატეს მდგომარეობაში აყენებს მსხვილ კომპანიებს წვრილ და საშუალო კომპანიებთან მიმართებაში.
ვფიქრობ, თუ ეს კანონმდებლობა იქნება გამართული და ე.წ. პარალელური იმპორტის კანონმდებლობაში შევა ის ცვლილებები, რითაც მცირე და საშუალო ბიზნესის წარმომადგენლებს ქვეყანაში მედიკამენტების იმპორტი გაუმარტივდებოდათ, ეს ავტომატურად და თავისთავად გამოიწვევდა სწორედ იმ პრობლემის მოხსნას, რაზეც პრემიერი და მთავრობა თავის განცხადებაში საუბრობდნენ,“ - აღნიშნა ლევან კობერიძემ.
მთავრობის დადგენილების მიხედვით, რომელსაც ხელს პრემიერ-მინისტრი ირაკლი ღარიბაშვილი აწერს, ფარმაცევტული პროდუქტის ფასის სახელმწიფო რეგულირების, წესისა და პირობების დამტკიცების შესახებ დადგენილებაში ცვლილებები შევიდა. მაღალი საზოგადოებრივი ან სახელმწიფოებრივი ინტერესიდან გამომდინარე, ფარმაცევტული პროდუქტის ფასების რეგულირების უწყებათაშორისი კომისია უფლებამოსილი იქნება კონკრეტულ ფარმაცევტულ პროდუქტებზე შესაბამისი ზღვრული საბითუმო სარეალიზაციო ფასი დაადგინოს ექსპერტული შეფასების საფუძველზე. ასევე, უწყებათაშორისი კომისია უფლებამოსილი იქნება კონკრეტულ ფარმაცევტულ პროდუქტებზე შესაბამისი საბითუმო სარეალიზაციო ფასი შემოიღოს ან განსაზღვროს და მასთან დაკავშირებული სხვა საკითხები მოაწესრიგოს. უწყებათაშორისი კომისიის შემადგენლობაში შედიან ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, ეკონომიკისა და მდგრადი განვითარების სამინისტროს, ფინანსთა სამინისტროს, შემოსავლების სამსახურის, ინტელექტუალური საკუთრების ეროვნული ცენტრის, სტატისტიკის ეროვნული სამსახურისა და კონკურენციის ეროვნული სააგენტოს წარმომადგენლები, ასევე, ორი პროფესიული პროფილის დამოუკიდებელი წევრი-ფარმაკოლოგი და ფარმაცევტი და სამედიცინო და ფარმაცევტული საქმიანობის რეგულირების სააგენტოს დირექტორი. კომისია უფლებამოსილი იქნება განსაზღვროს ფარმაცევტულ პროდუქტზე დადგენილი ფასის ძალაში შესვლის განსხვავებული ვადები და პირობები. კომისიის მიერ მიღებული გადაწყვეტილების შესაბამისად, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო ფასებს შესაბამის კატალოგში გამოაქვეყნებს. განახლებული ფასი კი ფასების კატალოგში გამოქვეყნებიდან 1 თვის ვადაში შევა ძალაში.