ქვეყანაში რუსული ფქვილის იმპორტის ზრდის ფონზე საქართველოში მოქმედი წისქვილკომბინატები გაჩერდნენ და ადგილობრივ დონეზე ფქვილის წარმოება აღარ ხდება. როგორც „კომერსანტთან“ ხორბლისა და ფქვილის მწარმოებელთა ასოციაციის დირექტორმა ლევან სილაგავამ განაცხადა, რუსეთიდან იმპორტირებული ფქვილის ფასის გამო, ქართველ მეწარმეებს ხორბლის გადამუშავება აღარ უღირთ, რადგანაც ხორბალი ძვირია და კომპანიებს წაგებაზე უწევთ მუშაობა.

ირკვევა, რომ დღეს რუსეთიდან იმპორტირებული ერთი ტომარა ფქვილის ფასი საცხობებისთვის 55 ლარია.

„ხორბლის იმპორტო ბოლო ხანებში ფაქტობრივად შეწყდა, რადგანაც აზრი არ აქვს მის შემოტანას. იანვარში შემოსული ხორბალი იყო ინერციით შემოსული ხორბალი, რომელიც ქვეყანაში წინა წელს დადებული კონტრაქტებით შემოვიდა. თან ნაწილი შემოვიდა ე.წ. „ველური ბარტერით“.

რაც შეეხება თებერვლის სტატისტიკას ჯერ არ გაქვს, მაგრამ ვიცით უკვე, რომ წისქვილკომბინატები ხორბალს აღარ ღებულობენ, რადგან ყველა წისქვილკომბინატი დაკეტილია. შესაბამისად ისინი არ იღებენ როგორც იმპორტირებულ, ასევე ადგილობრივი ფერმერებში დარჩენილ ხორბალს. ფერმერები ყოველდღე რეკავენ ხორბლის ჩაბარებასთან დაკავშირებით, მაგრამ ყველას უარით ვისტუმრებთ“, - აცხადებს სილაგავა.

ხორბლისა და ფქვილის მწარმოებელთა ასოციაციის დირექტორი ამბობს, რომ გასული წლის მსგავსად წისქვილკომბინატების ნაწილი ისევ ფქვილის იმპორტზე გადავა, თუმცა პრობლემები ამით არ გვარდება. გარდა ამისა, ადგილობრივი ფერმერები საკუთარ ბალანსზე არსებული ხორბლის რეალიზაციასაც ვეღარ ახერხებენ. ლევან სილაგავა აცხადებს, რომ წისქვილკომბინატები მათ საცავებში არსებული ხორბლის გაყიდვის გეგმებზე უკვე მუშაობენ.

„წისქვილკომბინატების ნაწილი ფქვილის ექსპორტზე ალბათ ისევ გადავა, თუმცა წელს უფრო რთული სიტუაციაა. პირველი ის, რომ წისქვილკომბინატებთან ერთად პრობლემები ექმნებათ ადგილობრივ ფერმერებს. თუ მათ არ გაყიდეს დარჩენილი ხორბალი, ისინი თავიანთ კრედიტებს ვერ დაფარავენ და შესაბამისად ხორბლის მომავალი ხვნა-თესვის სამუშაოები კითხვის ქვეშ დგება. შესაბამისად პრობლემა უფრო გაღრმავდა.

დღეს იმპორტირებული ხორბლის გარკვეული მარაგებიც წისქვილკომბინატებს აქვთ  „შეტენილი“. იანვრის თვეშია შემოტანილი ხორბალი და დღესაც წისქვილკომბინატშია დასაწყობებული.

ბევრი წისქვილკომბინატი განიხილავს ამ ხორბლის გაყიდვას საზღვრებს გარეთ, იგივე სომხეთში, თურქეთში და ასე შემდეგ. იმიტომ, რომ ამ სიტუაციაში მუშაობას აზრი არ აქვს. რაც უფრო იმატებს რუსეთში საექსპორტო ხორბალზე გადასახადი, მით უფრო იაფდება რუსული წარმოების ფქვილი“, - აცხადებს სილაგავა.

იმავდროულად, პრობლემაა ლარსის საბაჟო გამშვებ პუნქტზე სასწორის არსებობა.

„უკვე სისტემურად გამოიკვეთა პრობლემა. შემოსავლების სამსახურმა სხვა ადგილზე რამდენიმე ათეული მანქანა გადაწონა და გაირკვა, რომ ძალიან ბევრ სატვირთო მანქანაზე ზედმეტი ტვირთია, რომელიც წესით ამ მანქანაში , არ უნდა იყოს. მაგალითად, თუ უწერიათ ოფიციალურად, რომ ტვირთი არის 23 ტონა, მასზე რეალურად არის 28 ან 29 ტონა. შესაბამისად ეს 5-6 ტონა არის ზედმეტი და ეს სისხლის სამართლის თემას არ წარმოადგენს. შესაბამისად მას უღირს ჯარიმის გადახდა და შემდეგ ჯერზე იგივეს გააკეთებს და შესაბამისად ესეც ანგრევს ბაზარს. შემოდის ძალიან დაბალფასიანი ფქვილი“, - აცხადებს სილაგავა.

იანვარში რუსეთიდან იმპორტირებული ხორბლისა და ფქვილის სტატისტიკა:

ხორბლის ან ხორბალ-ჭვავის ფქვილი - 5 870.4 ათასი აშშ დოლარი, (17 928.7 ტონა)

ხორბალი და მესლინი - 5 318.2 ათასი აშშ დოლარი, (16 704.5 ტონა);