ლიეტუვის მართლმადიდებელი ეკლესიის კრებამ მხარი დაუჭირა მოსკოვის საპატრიარქოსგან დამოუკიდებლობას და ეკლესიის მეთაურის, მიტროპოლიტ ინოკენტის მიმართვას სინოდისადმი, რომ ლიეტუვის საეპისკოპოსოს თვითმმართველი ეკლესიის სტატუსი მიენიჭოს. კრებამ ამ პროცესის დაჩქარება მოითხოვა.
ინფორმაცია ვილნიუსში 27 დეკემბერს ჩატარებული კრების შესახებ, ლიეტუვის მართლმადიდებელი ეკლესიის ოფიციალურ ვებსაიტზე გამოქვეყნდა. ამ ცნობის თანახმად, კრებამ, რომელშიც სასულიერო პირებთან ერთად მონაწილეობდნენ მრევლის წარმომადგენელი საერო პირებიც, ხაზი გაუსვა, რომ ლიეტუვის მართლმადიდებელმა ეკლესიამ დაყოვნების გარეშე დაგმო უკრაინის წინააღმდეგ ომი.
კრების მონაწილეთა განცხადებით, ლიეტუვის მართლმადიდებელი ეკლესიის პრინციპული პოზიციაა, რომ მისი სტატუსი რეალურ მდგომარეობას უნდა შეესაბამებოდეს. საეპისკოპოსო შედის ლიეტუვის ტრადიციულ რელიგიურ თემებს შორის და დამოუკიდებელი რელიგიური ორგანიზაციაა, თუმცა, კანონიკური კავშირი აქვს მოსკოვის საპატრიარქოსთან. კრების განცხადებაში ნათქვამია, რომ ეს კავშირი არ წარმოადგენს შეფერხებას ლიეტუვის მართლმადიდებელი ეკლესიის დამოუკიდებლობისთვის.
ლიეტუვის მოსახლეობის ბოლო აღწერით, რომელიც 2021 წელს ჩატარდა, მართლმადიდებელია ქვეყნის მოქალაქეების 3.75%. ლიეტუველების 74%-ზე მეტი კათოლიკეა.