ლიეტუვის პრემიერ-მინისტრმა ინგრიდა შიმონიტემ „არაფერი ახალი“ უწოდა რუსეთის უშიშროების საბჭოს თავმჯდომარის მოადგილის დიმიტრი მედვედევის კომენტარს, რომელიც ნატო-ს ფინეთისა და შვედეთის გაწევრიანების შესაძლებლობის გამო დაემუქრა, - ინფორმაციას „როიტერსი“ ავრცელებს.
„რუსეთი რომ იმუქრება, ამაში ახალი არაფერია. კალინინგრადი მრავალი წელია რაც ძალიან მილიტარიზებული ზონაა და ის ბალტიის რეგიონშია“, - განუცხადა შიმონიტემ ჟურნალისტებს.
ლიეტუვის პრემიერ-მინისტრი აცხადებს, რომ ის მტკიცედ უჭერს მხარს შვედეთისა და ფინეთის პოტენციურ ნაბიჯებს ალიანსში გაწევრიანებასთან დაკავშირებით.
„მე მჯერა, რომ ამ ქვეყნების ნატო-ს წევრებად ყოფნა, მართლაც, მნიშვნელოვნად გააძლიერებს როგორც ალიანსს, ასევე ამ ქვეყნებს და ჩვენს უსაფრთხოებას“, - დასძინა მან.
შეგახსენებთ, რუსეთის უშიშროების საბჭოს თავმჯდომარის მოადგილემ, რუსეთის ყოფილმა პრეზიდენტმა დიმიტრი მედვედევმა დღეს განაცხადა, რომ ნატო-ში გაწევრიანების შემთხვევაში, ფინეთი და შვედეთი მოწინააღმდეგეებად იქნებიან აღქმული და ამას შედეგები მოჰყვება. მისი თქმით, უნდა დასრულდეს საუბარი ბირთვული იარაღისგან თავისუფალ ბალტიის რეგიონზე და "ბალანსი უნდა აღდგეს".