თბილისში, ლილოში, ნასაგურის დასახლებაში ყველის ქარხანა „კალტი“ იხსნება, როგორც კომპანიის თანადამფუძნებელი ნიკა ზაუტაშვილი „კომერსანტთან“ აღნიშნავს, ქარხნის მშენებლობა მიმდინარე წლის თებერვალში დაიწყო და აგვისტოში უკვე პირველი პარტიის გამოშვებას შეძლებს. მისივე თქმით საწარმო, როგორც ქართულს ასევე ევროპულ ყველსაც დაამზადებს - ქარხნის ყველი, სულგუნი, იმერული ყველი, რაც შეეხება ევროპულს, ასორტიმენტში იქნება, პარმეზანი, მოცარელა და გაუდა.
„ჩვენი საწარმო 1500 კვადრატული მიწის ფართობზეა გაშენებული. მშენებლობა თებერვალში დავიწყეთ. ქარხნის როგორც ტექნიკური ხაზი, ასევე შენობა-ნაგებობა აღჭურვილია ევროპული სტანდარტებით, ამ ეტაპზე საწარმო დასრულებულია. დანადგარების ნაწილს თურქეთიდან, ნაწილს კი ევროპიდან ველოდებით. უკვე აგვისტოს ბოლოდან ან სექტემბრის დასაწყისიდან პირველი პარტია ყველის გამოშვებასაც შევძლებთ“, - აღნიშნავს ნიკა ზაუტაშვილი.
ქარხანა რძეს ადგილობრივი გლეხებისგან და ფერმერებისგან ჩაიბარებს. როგორც ნიკა ზაუტაშვილი ამბობს, დღეში 10 ტონა რძეს ჩაიბარებს, ხოლო წარმადობა დღეში 2 დან 3 ტონამდე ყველი იქნება.
„ამ ეტაპზე საკუთარი ფერმა არ გვაქვს, თუმცა ფერმა ჩვენ სამომავლო გეგმებში შედის და როდესაც საწარმო განვითარდება ფერმაც გვექნება. საწყის ეტაპზე რძეს ადგილობრივი ფერმერებისგან და გლეხებისგან ჩავიბარებთ, თუმცა ჩვენი მოთხოვნაა, რომ რძე უმაღლესი ხარისხის და სერტიფიცირებული იყოს. რამდენიმე ჩამბარებელი პუნქტი გვექნება“,- აღნიშნა ნიკა ზაუტაშვილმა.
კომპანიის დამფუძნებელი აცხადებს, რომ „კალტის“ წარმოებული ყველი, თავის ადგილს დაიკავებს როგორც ქართულ, ასევე საერთაშორისო ბაზრებზე, მისივე თქმით უკვე მოლაპარაკებებს აწარმოებს, ევროპის, ამერიკის და ჩინეთის ბაზრებთანაც.
„მოლოდინები ადგილობრივ ბაზარზე დიდია, ასევე დიდ მოლოდინებს ვამყარებთ სხვა ქვეყნის ბაზრებთანაც. მოლაპარაკებებს ვაწარმოებთ აშშ-სთან, ჩინეთთან და ევროპის რამდენიმე ქვეყანასთან. რაც შეეხება საქართველოს, პირველ ეტაპზე თბილისში მაღაზიის გახსნას ვგეგმავთ, მოგვიანებით მაღაზიებს საქართველოს სხვა რეგიონებშიც გავხსნით“, - აცხადებს ნიკა ზაუტაშვილი.
მთლიანი პროექტის ინვესტიცია 3,5 მილიონ ლარს მოიცავს და პროექტი „თიბისი ბანკისა“ და სოფლის მეურნეობის სამინისტროს დაფინანსებით გაკეთდა. როგორც ნიკა ზაუტაშვილი აღნიშნავს დამფუძნებლების თანადაფინანსება 40%-ია. კომპანია 40 ადამიანს ასაქმებს.
თაკო კვაჭანტირაძე