რუსეთში ნიდერლანდური Lipton-ის შვილობილი კომპანია Ekaterra-ს აქციებს რუსეთის „გაერთიანებული ჩაის კომპანია“ ყიდულობს. მან ამ ტრანზაქციასთან დაკავშირებით ფედერალურ ანტიმონოპოლიურ სამსახურში განაცხადი უკვე შეიტანა. ინფორმაციას რუსული მედია ავრცელებს.

განცხადებაში გაერთიანებული ჩაის კომპანია ფედერალურ ანტიმონოპოლიურ სამსახურს Ekaterra-ს ძირითადი საწარმოო აქტივებისა და არამატერიალური აქტივების შესაძენად წინასწარ ნებართვას სთხოვს.

Ekaterra-მ რუსეთიდან გასვლის შესახებ 2022 წლის ზაფხულში, რუსეთის უკრაინაში შეჭრის შემდეგ გამოაცხადა. განაცხადში ნათქვამი იყო, რომ Lipton-ი, Saito და Brooke Bond-ი რუსეთში ჩაის წარმოებას 2022 წლის ბოლომდე შეწყვეტდნენ.

2022 წლის დასაწყისში Unilever-მა, რომელიც Ekaterra-ს ფლობდა, თავისი ჩაის განყოფილება CVC Capital Partners VIII-ს 4,5 მილიარდ ევროდ მიჰყიდა.

Ekaterra ჩაის სანქტ-პეტერბურგის ქარხანაში აწარმოებდა. ქალაქის ადმინისტრაციის ინფორმაციით, 2019 წელს ქარხნის სიმძლავრე წელიწადში 16 000 ტონამდე პროდუქციას შეადგენდა.

Росчайкофе-ს თანახმად, რუსული ჩაის ბაზრის მოცულობა წელიწადში დაახლოებით 140 000 ტონაა და Ekaterra-ს ბაზრის 10%-ზე მეტი ეჭირა.