საქართველოს ბანკისა და „თბილისი - წიგნის მსოფლიო დედაქალაქის“ პარტნიორობის ფარგლებში, რამდენიმე დღის წინ ორი სტუდენტური კამპუსი მოეწყო, რომელმაც ლიტერატურითა და კინოთი დაინტერესებულ, 80 სტუდენტს უმასპინძლა.
კამპუსის მონაწილე სტუდენტები ქართველ მწერლებს, რეჟისორებსა და კინომცოდნეებს შეხვდნენ, რომლებიც თანამედროვე თუ კლასიკური ლიტერატურისა და კინოს შესახებ, ამ სფეროებში მიმდინარე პროცესებზე, გავლენებსა და მათ მნიშვნელობაზე ესაუბრნენ. კამპუსი 2 კვირის განმავლობაში გაგრძელდა.
სტუდენტებისთვის, ასევე გაიმართა კინოჩვენებები, განხილვები, შემეცნებით-ინტელექტუალური თამაშები და სხვა აქტივობები.
პროექტი თელავის რაიონის სოფელ ართანაში, ორ ნაკადად ჩატარდა იმ ემოციებსა და შტაბეჭდილებებს, რაც კამპუსმა სტუდენტებს მოუტანა, თავად მონაწილეები გვიზიარებენ.
თაკო ციმინტია, კავკასიის უნივერსიტეტის სტუდენტი და მომავალი ფსიქოლოგია. მისთვის კამპუსში მონაწილეობის მთავარი მოტივი, გამორჩეული ადამიანების გამოცდილების გაზიარება იყო. „ინტერაქციულმა გარემომ დამარწმუნა იმაში, რომ ყველა ადამიანი უნიკალურია. კამპუსის წევრები, თითქოს, უნივერსალური ფაზლის წევრები ვართ, ამ ეტაპზე კი, ლიტერატურისადმი ლტოლვამ დაგვაახლოვა. ტუტორების მიერ გაზიარებულმა გამოცდილებამ და გულწრფელმა რჩევებმა, ჩემში გააღვივა მიძინებული მოტივაცია - მცდელობის შეუწყვეტლობის შესახებ. მათი დამსახურებაა, რომ ხელახლა ჩავუღრმავდი საკუთარ თავს და ვიპოვე ის პატარა ჭანჭიკი, რომელიც წარმატების გზაზე გამიყვანს”-, ამბობს ის.
კიდევ ერთი მონაწილე გიორგი ქენქაძე საავიაციო უნივერსიტეტის სტუდენტია. მისი თქმით, მართალია ის უვე მესამე კურსზეა, თუმცა, პანდემიის გამო, წელიწადნახევარია, აუდიტორიაში არ ყოფილა. „მარგარეტ მიტჩელი ნუ მიწყენს და ჩემს თაობას “სტუდენტობაწაღებულებს ვუწოდებ. ზოგადად, თუ წიგნთან მწყრალად არ ხართ, ალბათ, ლიტერატურულ კამპუსში მონაწილეობას, თქვენთვის ყველაფრის მოცემა შეუძლია, რაც ზაფხულის თავისუფალ დროს შეიძლება მიიღო. მით უფრო, “უუნივერსიტეტობის” ჟამს, აუცილებელია, რომ არ გავჩერდეთ“ ამბობს გიორგი და დასძენს -„თბილისი რომ წიგნის მსოფლიო დედაქალაქია, ეგ ხომ თავისთავად დიდი ამბავია, ჰოდა, კამპუსიც, ზუსტად ისე იყო ორგანიზებული, როგორც არ მოვლენას შეესაბამება.”
აკა ქერქაძე თბილისის სახელმწიფო უნივერსიტეტის ეკონომიკის საერთაშორისო სკოლის მეორე კურსის სტუდენტია. როგორც ის აბობს, სტერეოტიპულად მიჩნეულია, რომ ტექნიკური საგნებისადმი მიდრეკილ ადამიანს, შეიძლება, ლიტერატურა არ აინტერესებდეს, რაც მის შემთხვევაში, ასე არასდროს ყოფილა. „ზაფხულის პერიოდში ვცდილობ, დროის მნიშვნელოვანი ნაწილი კითხვას დავუთმო, სწავლის პერიოდში კი პატარა ნოველებითა და მოთხრობებით ვეცნობი სხვადასხვა ავტორს. პროფესიული არჩევანიდან გამომდინარე, თითქმის არასდროს მქონია შეხება ლიტერატურის მოყვარულ, ჩემი ასაკის ადამიანებთან. ლიტერატურის კამპუსის გარემო, ჩემთვის იყო შესაძლებლობა, მოვწყვეტილიყავი ყოფით, თითქმის რუტინულ ცხოვრებას, პირისპირ მქონოდა ურთიერთობა ცნობილ ქართველ მწერლებთან და დამემყარებინა კონტაქტი ახალ ადამიანებთან. კამპუსელებისგან ლიტერატურის შესახებ ბევრი რამ გავიგე და ბევრი წიგნის რეკომენდაციაც მივიღე. დიდი იმედი მაქვს, ეს ურთიერთობები მხოლოდ ამ შვიდი დღით არ შემოიფარგლება და ხანგრძლივ, საინტერესო ურთიერთობებს ჩაეყრება საფუძველი“, - გვიზიარებს აკა.
თბილისის სახელმწიფო უნივერსიტეტის ჰუმანიტარული მეცნიერებების ფაკულტეტის სტუდენტი ანა, ინგლისური ფილოლოგიის მიმართულებით სწავლობს. ამბობს რომ, მისთვის თანამედროვე ქართული ლიტერატურა ნაკლებად ახლობელი იყო, კამპუსმა კი ინტერესი გაუღვივა თანამედროვე ქართველი მწერლების შემოქმედებისადმი. მე ახალგორიდან ვარ და საინტერესო იყი სხვადასხვა ადამიანის პერსპექტივის მოსმენა ამბის თხრობაზე, ომზე და ლიტერატურაზე სემინარების განმავლობაში“,- აღნიშნავს ანა. თაკო წულაია კი, რომელიც ილიას სახელმწიფო უნივერსიტეტში ლიტერატურათმცოდნეობას ეუფლება, ამბობს რომ საკუთარი თავი ლიტერატურის სიყვარულის გარეშე არ ახსოვს.
„ლიტერატურა ჩემთვის საკუთარ თავთან და დანარჩენ სამყაროსთან ურთიერთობის, კონკრეტული ადამიანისა და ზოგადად, ადამიანური ბუნების გაცნობის საშუალებაა. საბედნიეროდ, ლიტერატურულმა კამპუსმა შეითავსა ყველაფერი ის, რაც ლიტერატურაში მიყვარს და რაც ყოველდღიურ ცხოვრებაში, განსაკუთრებით კი, პანდემიისას, გაიშვიათდა. ვგულისხმობ ურთიერთობებს, განსხვავებული ადამიანების გაცნობის, თანამედროვე ქართველ მწერლებთან შეხვედრისა და მოსაზრებების გაზიარების შესაძლებლობას. ესაა გამოცდილება, რომელმაც ერთმანეთთან და ტექსტებთან დაგვაახლოვა.“
ინფორმაციისთვის, UNESCO-ს პროექტი, „თბილისი - წიგნის მსოფლიო დედაქალაქი“ თბილისის მერიის ინიციატივითა და "საქართველოს ბანკის" მხარდაჭერით ხორციელდება. აღნიშნული ერთ-ერთია იმ მრავალი პროექტიდან, რომელსაც საქართველოს ბანკი კორპორაციული სოციალური პასუხისმგებლობის ფარგლებში, განათლების ხელშეწყობს მიზნით ახორციელებს. ვრცლად ბანკის სხვა CSR პროექტების შესახებ ინფორმაციას აღნიშნულ ბმულზე გაეცნობით: https://csr.ge/ka
(R)
საქართველოს ბანკი
