მცირე და საშუალო კომპანიების ნაწილმა, რომელიც ლოქდაუნის პერიოდში გაჩერებული იყო, საქმიანობის გაგრძელება ვერ შეძლო, ასეთი  დაახლოებით 18%-ია.  მცირე და საშუალო საწარმოების ასოციაციის ხელმძღვანელის მიხეილ ჭელიძის ინფორმაციით, 2020 წელს კომპანიების 30% გაკოტრებული იყო, აქედან ნახევარზე მეტი ვერ გადარჩა. 

„გაჩერებული კომპანიებიდან მცირე ნაწილმა გააგრძელა მუშაობა, მაგრამ ეს მათი კეთილდღეობის ხარჯზე არ მომხდარა. უბრალოდ, გაკოტრებას გადაურჩნენ. მათ უმეტესობას ამისთვის დამატებითი სესხი დასჭირდა, საბოლოოდ კი გამოვიდა ისე, რომ გაეზარდათ ხარჯი, ხოლო  შემოსავალი, მინიმუმ, შეუმცირდათ. დღესდღეობით თუ ვინმე საქმიანობას აგრძელებს, არ ნიშნავს, რომ შუქი აანთო ბიზნესმა და უცებ ფული გაჩნდა, ასე არ არის. გახსნას შემოსავლების კლება და პრობლემა დახვდა. ძირითადად სარესტორნო ბიზნესს ვგულისხმობს. ისინი ყოველთვის წინა ხაზზე იყვნენ და პანდემიამ ყველაზე მეტად სწორედ მათ დაარტყა“, - ამბობს მიხეილ ჭელიძე.

მისი თქმით, ბიზნესისთვის ახლა მთავარია, ისწავლოს კოვიდთან თანაცხოვრება და არა მისგან დისტანცირება. თანაცხოვრება კი არის პირბადე, ოჯახური ვიზიტებისგან, დაბადების დრღისა და ქორწილებისგან თავის შეკავება და სხვა. ასოციაციის ხელმძღვანელი კატეგორიულად აცხადებს, რომ ბიზნესი არ უნდა დაიკეტოს, როგორიც არ უნდა იყოს ეპიდვითარება ქვეყანაში.

ცნობისთვის, მიმდინარე წლის მაისში მიხეილ ჭელიძე აცხადებდა, რომ მცირე კომპანიების რაოდენობა 30%-ით არის შემცირებული.  მაისის მდგომარეობით, საქართველოში ბოლო ერთ წელში 1704 კომპანია აღირიცხა, რომელმაც ოპერირება სრულად შეწყვიტა. 

მარი ჩიტაია