ლონდონის „სითის“ კომპანიებში მომუშავე ბრიტანელმა იურისტებმა ასობით გახმაურებული რუსის უცხოური აქტივები დაადგინეს, რომლებიც შესაძლოა, დასავლური სანქციების შემდეგი სამიზნეები გახდნენ. ინფორმაციას Bloomberg ამ სამუშაოში მონაწილე წყაროებზე დაყრდნობით ავრცელებს.
სააგენტო არ აკონკრეტებს, თუ რომელი ბრიტანული კომპანიები მონაწილეობდნენ რუსების შესახებ ინფორმაციის შეგროვებაში. ერთ-ერთი წყაროს ცნობით, სიაში რუსეთის მაღალი რანგის, მაგრამ არც ისე საჯარო ოფიციალური პირები და სამხედრო მოსამსახურეები შედიან, რომლებიც ლონდონსა და სამხრეთ საფრანგეთში მილიონობით ფუნტის ღირებულების უძრავ ქონებასა და სხვა აქტივებს ფლობენ. იურისტები, ასევე, ამოწმებენ რუსების სხვა საერთაშორისო კავშირებს, მათ შორის ინფორმაციას მათი შვილების შესახებ, რომლებიც უცხოურ კერძო სკოლებში სწავლობენ.
Bloomberg წერს, რომ კიევმა თავდაპირველად ეს ინფორმაცია დიდ ბრიტანეთში მომუშავე უკრაინელი დიპლომატებისგან გამოითხოვა, რომლებმაც, თავის მხრივ, ლონდონის „სითის“ ერთ-ერთ კომპანიას მიმართეს. მოგვიანებით მუშაობას რამდენიმე სხვა კომპანიაც შეუერთდა. იურისტებმა გამოჟონილი მონაცემები გამოიყენეს, როგორიც არის „პანამის არქივის“ დოკუმენტები. მათ ეს მასალა სხვა წყაროებთანაც გადაამოწმეს, რომ დარწმუნებულიყვნენ, იყო თუ არა ქონება კანონიერად მოპოვებული.
ორი კომპანიის თანამშრომლებმა, რომლებიც რუსული აქტივების ძიებაში მონაწილეობდნენ, Bloomberg-ს განუცხადეს, რომ ისინი უფასოდ მუშაობდნენ და სანქციების სიაში შესატან კანდიდატთა გვარები ლონდონში უკრაინის საელჩოს გადასცეს. ეს იურისტები მხოლოდ ანონიმურობას ითხოვდნენ, რომ რუსეთის ხელისუფლების მხრიდან ზეწოლა თავიდან აეცილებინათ.
ლონდონში უკრაინის საელჩომ Bloomberg-ს განუცხადა, რომ შესაძლო სამომავლო სანქციებზე წინასწარ კომენტარის გაკეთება „უადგილოა,“ რადგან ამან შესაძლოა „მათი ეფექტი შეარბილოს.“
იურიდიული კომპანია Crowell & Moring-ის პარტნიორმა, მიშელ ლინდერმანმა Bloomberg-ს განუცხადა, რომ სანქციების სიაში მეტი რუსის დამატება ლონდონს შესაძლოა, რუსულ ბიზნესინტერესებთან ბრძოლაში დაეხმაროს, კერძოდ, ამოავსოს „უზარმაზარი ხვრელი,“ რომლითაც ზოგიერთმა მდიდარმა რუსმა უკრაინის ომის დაწყებიდან თავისი აქტივების ოჯახის წევრებზე ან პარტნიორებზე, ასევე, მესამე მხარის სტრუქტურებზე გადაფორმება შეძლო. ამან აქტივების გაყინვას ხელი შეუშალა.
სანქციები
