მოსკოვის ბირჟა 25 თებერვლის შემდეგ აღარ გახსნილა, რუსულ კომპანიათა ნაწილი, გარიცხვამდე 1 კვირა ლონდონში განაგრძობდა ვაჭრობას, ამ პერიოდში მათ ღირებულების 90%-ზე მეტი დაკარგეს.

გაზპრომის კაპიტალიზაცია 16 თებერვალს $106 მლრდ-ს შეადგენდა, 20 თებერვალს ე.წ. დონეცკისა და ლუგანსკის რესპუბლიკების აღიარებამდე 1 დღით ადრე - $95 მლრდ-ს, 23 თებერვალს ომის დაწყებამდე $74 მლრდ-ს, 3 მარტს $13 მლრდ-ს. მას შემდეგ მისი ზუსტი ღირებულების განსაზღვრა უკვე შეუძლებელია, თუმცა ამ ორ კვირიან პერიოდშიც გაზპრომმა კაპიტალიზაციის 88% დაკარგა.

იმავე პერიოდში უდიდესი სბერბანკის კაპიტალიზაცია $80 მლრდ-დან 2.8 მლრდ-მდე შემცირდა ეს კი 97%-იან ვარდნას ნიშნავს.

ლუკოილის, რომელიც საქართველოშიც ოპერირებს $60 მლრდ-დან $4.5 მლრდ-მდე ანუ 93%-ით.

მოსკოვის ბირჟა 28 თებერვალს დილის 09:00 სთ-ზე კოლაფსის თავიდან აცილების მიზნით არ გაიხსნა, გახსნის თარიღმა ჯერ იმავე დღის 15:00 სთ-მდე, შემდეგ 2 მარტამდე, 3 მარტამდე, 7 მარტამდე და 9 მარტამდე გადაიწია, თუმცა არც 9 მარტს გახსნილა.

4 მარტამდე, დიდი რუსული კომპანიების ნაწილი ლონდონში განაგრძობდა ვაჭრობას, შემდეგ იქიდანაც გარიცხეს. 8 მარტს საღამოს შეერთებულმა შტატებმა და დიდმა ბრიტანეთმა რუსული ნავთობის შესყიდვაზე უარი განაცხადეს, რაც წესით რუსული ნავთობკომპანიების ფასს კიდევ უფრო შეამცირებდა, თუმცა რამდენით ამის ზუსტად დადგენა ახლა უკვე შეუძლებელია.