ლოს-ანჯელესის ცენტრში მდებარე Staples Center-ის სპორტულ-გასართობ არენას Crypto.com Arena დაერქმევა. Staples Center-ის ოპერატორი კომპანიის განცხადებას Reuters ავრცელებს.
განცხადებაში ნათქვამია, რომ სახელის გადარქმევა 20-წლიანი შეთანხმების საფუძველზე მოხდა, რომელიც ცენტრის ოპერატორ კომპანია AEG-ისა და სინგაპურში დაფუძნებულ პლატფორმა Crypto.com-ს შორის გაფორმდა. შეთანხმება ძალაში შობის დღიდან შევა.
Staples Center არენა NBA-ის Los Angeles Lakers-ისა და LA Clippers-ის, ასევე, NHL-ის LA Kings-ისა და WNBA-ს Los Angeles Sparks-ის კლუბების სახლია. Los Angeles Times წყაროზე დაყრდნობით იტყობინება, რომ სინგაპურში დაფუძნებულმა პლატფორმა Crypto.com-მა სახელის გადარქმევის უფლებისთვის 700 მლნ დოლარზე მეტი გადაიხადა. კრიპტოპლატფორმამ თავის ვებგვერდზე გამოქვეყნებულ განცხადებაში გარიგება დაადასტურა.
20 წელზე მეტი ხნის განმავლობაში Staples Center არენა გახმაურებული ღონისძიებების, გრემისა და ცნობილი მომღერლების, ტეილორ სვიფტის, ბიონსესა და ედ შირანის კონცერტების ადგილი იყო.
„ბოლო თვეებში კრიპტოვალუტებმა დიდი ინტერესი მიიპყრო, რადგან ძირითადი ინვესტორები და კომპანიები ბიტკოინსა და სხვა ციფრულ ტოკენებს ითვისებენ,“ - წერს Reuters.
Staples Center-ის ვებსაიტზე გამოქვეყნებულ ერთობლივ განცხადებაში მხარეები აცხადებენ, რომ გარიგების შედეგად კრიპტოვალუტის პლატფორმა Crypto.com კლუბების, Los Angeles Lakers-ისა და LA Kings-ის ოფიციალური პარტნიორი გახდება.
ცოტა ხნის წინათ საფეხბურთო კლუბ Paris St Germain-მა გამოაცხადა, რომ კლუბთან ლიონელ მესის ხელშეკრულებით გათვალისწინებული საფასური რამდენიმე კრიპტოვალუტის ტოკენსაც შეიცავს.
Crypto.com 2016 წელს დაარსდა. პლატფორმის ინვესტორი მსახიობი მეტ დეიმონია, რომელმაც ახლახან მის სარეკლამო კამპანიაში მიიღო მონაწილეობა.
bpn.ge