ლუდის ადგილობრივ წარმოებას ბაზრის დაახლოებით 90% უჭირავს და იმპორტი თითქმის ჩაანაცვლა, — ამის შესახებ „ეფეს საქართველოს“ („ნატახტარი“) კორპორატიულ საქმეთა დირექტორი ნიკოლოზ ხუნძაკიშვილი „კომერსანტთან“ საუბრობს.

მისი თქმით, საქართველოში ლუდის ინდუსტრიაში კონკურენცია მაღალია, რაც ხარისხიანი პროდუქციის შექმნას უწყობს ხელს.

„ლუდის ბაზარზე იმპორტირებული პროდუქცია მცირე რაოდენობით შემოდის, დაახლოებით 10%-ია უცხოეთიდან შემოტანილი, ძირითადად პრემიუმ ბრენდის ლუდებია. ეს ძალიან მცირე მოცულობაა, ძირითადად ჩვენი სეგმენტი ქართულ პროდუქციას უჭირავს, სადაც ხარისხი და კონკურენცია მაღალია“, — ამბობს ნიკოლოზ ხუნძაკიშვილი.

„ნატახტარის“ კორპორატიულ საქმეთა დირექტორი აღნიშნავს, რომ 2022 წელს ლუდის ინდუსტრია დაახლოებით 5%-ით გაიზარდა.

„გასულ წელს ლუდის ბაზრის მოცულობამ 125 მლნ ლიტრი შეადგინა, რაც 2021 წელთან შედარებით თითქმის 5%-იანი ზრდაა. შეაიძლება ითქვას, რომ ლუდის ინდუსტრიისთვის 2022 წელი კარგი იყო. მოთხოვნის ზრდის კუთხით მთავარი მიზეზები პოსტპანდემიური პერიოდი და ომია, რის გამოც საქართველოში მიგრანტების დიდი რაოდენობით შემოსვლა მოხდა. გარდა ამისა, 2022 ჰორეკა სექტორის გამოცოცხლების წელი იყო, რამაც მოთხოვნა განსაკუთრებით გაზარდა დიდი მოცულობის ანუ 50 ლიტრიან კასრებზე“, — აღნიშნავს ნიკოლოზ ხუნძაკიშვილი.

მიმდინარე წლის  იანვარში ლუდის იმპორტში პირველი ადგილი გერმანიას ეჭირა, ხოლო საქართველოდან ყველაზე დიდი რაოდენობით პროდუქცია რუსეთის ბაზარზე გავიდა.