„მიუხედავად იმისა, რომ შარშანდელთან შედარებით ლუდის ბაზარი არ შემცირებულა, გაიზარდა ეკონომ-სეგმენტის მოხმარება. თუ შარშან  მთელი  ეკონომ-სეგმენტი ბაზრის  დაახლოებით  5% იყო , დღეს არის — 20%-ზე,“ - ამის შესახებ „კომერსანტს“კომპანია „ნატახტარის“ კორპორატიულ საქმეთა დირექტორი ნიკოლოზ ხუნძაკიშვილი ესაუბრა.

პანდემიის შემდეგ სხვადასხვა ობიექტების საქმიანობის, ღონისძიებების ჩატარების შეჩერებასთან ერთად, საზოგადოების ეკონომიკურმა მდგომარეობამ, ლუდის ბაზარზეც მომხმარებლის ცევაში გარკვეული ცვლილებები გამოიწვია. კერძოდ, იმატა ნაკლებფასიანი ლუდის მოხმარებამ იმის ფონზე, როდესაც ბაზრის მოცულობა, წარმოება და მოთხოვნა ჯამში არ შეცვლილა, შეიცვალა სეგმენტებს შორის გადანაწილება.

„მოსახლეობას განკარგვადი შემოსავალი შეუმცირდა, რაც  ბუნებრივია  ეკონომიკური კლების  ფონზე.  შესაბამისად, ყველა კომპანიამ, მათ შორის ჩვენც, გადავგეგმეთ სტრატეგია ბაზართან მიმართებაში.

ის რაც ჩემთვის იყო  ტაქტიკური ბრენდი, დღეს ყველაზე გაყიდვადი ბრენდი გახდა. თუმცა, ეს  იმას არ ნიშნავს, რომ ზოგადად  ბაზარი  ჩამოვწიოთ ეკონომ- სეგმენტზე,  ანუ  ჩვენ მაინც ვცდილობთ, რომ  ბაზრის მთავარი დინება შევინარჩუნოთ, ეკონომ სეგმენტს პატარა მარჟა აქვს.

ეს არის  ძალიან რთული,  თუმცა ყველა  რესურსს მივმართავთ იმისკენ, რომ  ბაზრის  სიჯანსაღე შევინარჩუნოთ. თუ ერთ დღეს მთელი ბაზარი გახდება  ეკონომ სეგმენტი, საერთოდ  ღირებულება  დაეკარგება და  კომპანიებს  შემოსავალი არ ექნებათ, რაც პირდაპირ კავშირშია დასაქმებასთან, გადასახადების გადახდასთან და ა.შ.

ზოგადად, ლუდის ბაზარი დინამიურად ვითარდება, რამდენიმე  პროცენტით იზრდება,  რაც  პრაქტიკულად არ არის  სასურველი. რაც 2019 წლამდე გვქონდა, პრაქტიკულად  შემცირდა და ახლა 2014 ან შეიძლება 2012 წლის მდგომარეობაში ვართ,“- განმარტავს ნიკოლოზ ხუნძაკიშვილი.  

ვინ არის ლიდერი დღეს ლუდის ბაზარზე?- ნიკოლოზ ხუნძაკიშვილი მიიჩნევს, რომ ლიდერობას ნატახტარი კვლავ ინარჩუნებს, თუმცა საქართველოს ბაზარი ძალიან პატარაა Top-4 ძირითადი მოთამაშისთვის.

რაც შეეხება ლიდერობას, იგივე მოწინავე პოზიციებს ვინარჩუნებთ, რაც  მანამდე გვქონდა.  ლუდის ბაზარზე პირველი არის „ნატახტარი“,  მეორე  „ზედაზენი“, მესამე  „აისი“, მეოთხე არის -  „არგო“. აქ პრობლემა არის ის , რომ საქართველოს ბაზარი ძალიან პატარაა, 4 მოთამაშისთვის,“ - ამბობს ბიზნესმენი.

მარიამ მორგოშია