გერმანული ავიაკომპანია Lufthansa იტალიის სახელმწიფო კომპანია Alitalia-ს მემკვიდრის, ITA Airways-ის 40%-იანი წილის შეძენას აპირებს. გარიგება შესაძლოა, მომავალ კვირას გამოქვეყნდეს. ინფორმაციას იტალიურ გაზეთ Il Foglio-ზე დაყრდნობით Reuters ავრცელებს.

ITA Airways-მა ფრენა 15 ოქტომბერს დაიწყო. კომპანიაში დაახლოებით, 2 300 ადამიანია დასაქმებული. მისი ავიაფლოტი ორჯერ ნაკლებია, ვიდრე ჰქონდა Alitalia-ს, რომელსაც 75 წლის ყოფილი ნაციონალური ავიაკომპანიაა. Alitalia-მ ძირეული რესტრუქტურიზაცია გაიარა და მფლობელი გამოიცვალა.

გაზეთი გარიგების ფასს არ ასახელებს, თუმცა წერს, რომ ორი კომპანია ახლოს იყო შეთანხმებასთან რამდენიმე საკვანძო პირობაზე, როგორიც არის აფრიკის მიმართულებით პირდაპირი ფრენები და ამერიკის კონტინენტზე ზოგიერთი მარშრუტისთვის რომის ფიუმიჩინოს აეროპორტის გამოყენება.

ITA Airways-ში აცხადებენ, რომ ავიაკომპანიის უმაღლესი მენეჯმენტი სტრატეგიულ გეგმას კომპანიის დირექტორთა საბჭოს 31 იანვარს წარუდგენს. ამასთან, მონაცემთა ოთახი გაიხსნება მომდევნო დღეებში, რაც პოტენციურ პრეტენდენტს ან პარტნიორს საშუალებას მისცემს, ფინანსურ დოკუმენტებზე ჰქონდეს წვდომა კომპანიის ღირებულების შესაფასებლად.

მანამდე წყარომ Reuters-ს აცნობა, რომ 12 იანვარს ITA Airways ავიაკომპანიებს, Lufthansa-ს, British Airways-სა და შეერთებულ შტატებში დაფუძნებულ Delta Air Lines-ს წილობრივი პარტნიორობის წინადადებით დაუკავშრდა.

Delta Air Lines-მა ITA Airways-ში ინვესტირებაზე უარი განაცხადა.

ამჟამად გერმანიის მთავრობა Lufthansa-ს აქციების 14%-ს ფლობს, რაც 2020 წლის კორონაპანდემიის კრიზისისგან გადარჩენის მიზნით, ფინანსური დახმარების ფარგლებში გაფორმდა. მთავრობა მიზნად ისახავს, თავისი აქციები არაუგვიანეს 2023 წლის ოქტომბრამდე გაყიდოს.

Lufthansa-ს ჯგუფი გაკოტრებისგან გერმანიის, შვეიცარიის, ავსტრიისა და ბელგიის მთავრობების მიერ გამოყოფილმა და ევროკომისიის მიერ დამტკიცებულმა 9 მლრდ ევროს (10,21 მლრდ დოლარის) ფინანსურმა მხარდაჭერამ იხსნა.

]წყარო:  "ბიზნესპრესნიუსი"