4 ივლისს შვეიცარიის ქალაქ ლუგანოში თავს მოიყრიან ათობით ქვეყნის და საერთაშორისო ორგანიზაციების ლიდერები და იმსჯელებენ უკრაინის რეკონსტრუქციის სამომავლო გზებზე - იმ ფონზე, როცა უკრაინაში რუსეთი ომს განაგრძობს.
მოელიან, რომ ლუგანოს ორდღიანი კონფერენციის მონაწილეებს შორის იქნებიან უკრაინის პრემიერ-მინისტრი, დენის შმიგალი და ევროკომისიის ხელმძღვანელი, ურსულა ფონ დერ ლაიენი.
უკრაინის პრეზიდენტი, ვოლოდიმირ ზელენსკი - რომელიც ღონისძიებაში ვირტუალურად მიიღებს მონაწილეობას - გამოვიდა გაფრთხილებით, რომ მხოლოდ იმ ადგილებშიც, რომლებიც უკრაინის ძალებმა გაათავისუფლეს, ჩასატარებელი სამუშაო „ნამდვილად კოლოსალური“ იქნება.
„აუცილებელია არა მხოლოდ იმ ყველაფრის აღდგენა, რაც ოკუპანტებმა გაანადგურეს, არამედ ჩვენი ცხოვრებისთვის ახალი ფუნდამენტის შექმნა - უსაფრთხოსი, თანამედროვესი, კომფორტულის, ხელმისაწვდომის“ - თქვა ზელენსკიმ 3 ივლისს.
უკრაინის დანგრეული ინფრსტრუქტურის აღდგენას ასობით მილიარდი ევრო დაჭირდება. კონფერენციაზე მიიღებენ ერთობლივ განცხადებას, რომელიც ლუგანოს დეკლარაციის სახელით გახდება ცნობილი.