პანდემიის პერიოდში ერთ–ერთი ყველაზე დიდი პრობლემა, რაც შრომის ბაზარზე გამოიკვეთა, დასაქმებულებს უკავშირდება. იმის გამო, რომ ინფიცირების მაჩვენებელი მატულობს, კომპანიებში ხშირად უწევთ თანამშრომლების გათავისუფლება გარკვეული ვადით, რაც ბიზნესში არასტაბილურობას იწვევს. ამის შესახებ „კომერსანტთან“ სამეწარმეო ბიზნესის და სავაჭრო ობიექტების წარმომადგენლები აცხადებენ.
როგორც შესაფუთი მასალების მწარმოებელი კომპანია „გრინპაკის“ დამფუძნებელი პაატა აბრამია ამბობს, ქარხანაში 35 დასაქმებულია და დღეს პრობლემა ყველაზე მეტად შრომითი რესურსის განაწილებას უკავშირდება.
„ლარის კურსი, ინფლაცია, პანდემიური სიტუაცია და სხვა უამრავი მიზეზია, რაც ბიზნესში არასტაბილურობის განცდას იწვევს. თუმცა, ამ ეტაპზე ყველაზე მეტად დასაქმების მიმართულებით გვაქვს პრობლემა. არის შემთხვევები, როცა დასაქმებულები, ან მათი ოჯახის წევრები ინფიცირდებიან და ამის გამო ადამიანი სამუშაო პროცესს დროებით ეთიშება. მიუხედავად ამისა, არ გავჩერებულვართ, ვმუშაობთ რეგულაციების დაცვით, ამ ეტაპზე საწარმოში 35 დასაქმებულია. კადრები არ შეგვიმცირებია, თუმცა ვერ გავზარდეთ, როგორც ეს დაგეგმილი იყო“, - ამბობს არახამია „კომერსანტთან“ საუბარში.
ანალოგიურ პრობლემაზე საუბრობს კომპანია ,,კუმისის“ დამფუძნებელი ზურაბ უჩუმბეგაშვილი, რომლის ინფორმაციითაც, ამ ეტაპზე ყველაზე მეტი პრობლემა საწარმოო პროცესს უკავშირდება, კერძოდ, მუშახელის ნაკლებობას.
„პანდემიაა და სანამ საშიში ვირუსი არსებობს საქართველოში, შრომის ბაზარზე მუდმივად იქნება პრობლემა. კომპანიაში 150 დასაქმებულია. კადრებს ვინარჩუნებთ, მაგრამ ხშირად გვიწევს დროებით ადამიანის გათავისუფლება, რაც შემდეგში საწარმოო პროცესზე ნეგატიურად აისახება. ჩვენ არ ვართ გამონაკლისი, ასე მუშაობენ კომპანიები მთელ მსოფლიოში. ფაქტობრივად ფორსმაჟორული სიტუაციაა, რასთანაც დღესდღეობით ბიზნესს უწევს გამკალვება. მუდმივად გვიწევს გადაწყობა, გაჭირდა მუშახელი, თან, კვალიფიკაციის პრობლემაცაა. დღესდღეობით ვუძლებთ, მაგრამ სანამ ინფიცირების მაჩვენებლები მატულობს, შეიძლება უფრო გაგვიჭირდეს“, - ამბობს ბიზნესმენი.
აღნიშნულთან დაკავშირებით „კომერსანტთან“ საუბრობენ დასაქმებულებიც. სვეტლანა იოსავა ერთ-ერთ სუპერმარკეტში მუშაობს. მისი თქმით, კადრების სისტემატური ცვლილების გამო გრაფიკის მიხედვით უკვე ვერ მუშაობს და თავისუფალი დრო იშვიათად რჩება.
„ვმუშაობთ ყველა რეგულაციის დაცვით, გვიტარდება ტესტი, ამ მხრივ ადგილზე უსაფრთხო გარემოა, მაგრამ მაინც არის ინფიცირების შემთხვევები, მუდმივად 10 ადამიანი ვმუშაობთ მაღაზიაში, სულ 22 დასაქმებულია. ხან ინფიცირებულის კონტაქტი აღმოჩნდება ვინმე ან აოჯახის წევრი და დროებით გვიწევს სამუშაო ადგილის მიტოვება. მეც 12 დღე გამოვეთიშე სამუშაოს, რადგან შვილი ინფიცირებული იყო. სულ რამდენიმე დღეა, სამსახურში გავედი, მაგრამ არის შემთხვევები, როცა სხვისი სამუშაოს განაწილება გვიწევს, ახალი კადრი არ დაუმატებიათ, თუ აქამდე 2 დღე ვმუშაობდი და მომდევნო 2 დღე ვისვენებდი, 3 დღე გადაბმულად ვმუშაობ, რაც ძალიან რთულია, არანორმალურ რეჟიმში ვართ“, - ამბობს სვეტლანა იოსავა.
შეგახსენებთ, რომ ბოლო 24 საათში საქართველოში კორონავირუსით ინფიცირების 5128 ახალი შემთხვევა დადასტურდა. სულ ქვეყანაში ვირუსის გავრცელებიდან დღემდე დაინფიცირდა 466 326 ადამიანი.
გასულ დღე-ღამეში გარდაიცვალა 49 პაციენტი. სულ ქვეყანაში ვირუსს 6 279 მოქალაქე ემსხვერპლა.
დადებითობის მაჩვენებელი: დღიური - 10,43%, ბოლო 14 დღის - 9,63%, ბოლო 7 დღის - 10,52%.
მარი ჩიტაია