საქართველოში მაღალი ინფლაციის გამომწვევ მთავარ ფაქტორად გლობალური პროცესები სახელდება. ამას აღიარებს მთავრობა და საწინააღმდეგო აზრი არც ექსპერტებს აქვთ, მაგრამ ცალკე აღსანიშნავია მეთოდოლოგია, რამაც ინფლაციური მაჩვენებლების გამოთვლაში დიდი  როლი ითამაშა. კერძოდ, როგორც სტატისტიკოსი სოსო არჩვაძე ,,კომერსანტთან“ განმარტავს, თავის დროზე სუბსიდირების მექანიზმის ინფლაციაში გათვალისწინებამ კლება განაპირობა და ახლა პირიქით - იგივე მეთოდოლოგიით ისედაც მაღალი ინფლაცია ხელოვნურად გაიზარდა.

,,თავის დროზეც ვამბობდი და ვურჩევდი ეკონომიკურ გუნდს, რომ სუბსიდირების მექანიზმი ინფლაციის გამოთვლისას არ გაეთვალისწინებინათ. თუმცა წინასაარჩევნო პერიოდი იყო და ამ ზომების მიღება მთავრობამ საჭიროდ ჩათვალა. პირობითად, 100 მილიონი ლარის კომუნალურ ხარჯებში მოსახლეობამ მხოლოდ 60 მილიონი გადაიხადა, დანარჩენი 40 მილიონი მთავრობამ დაუსუბსიდირა. სტატისტიკურ მაჩვენებლებში ცვლილება აისახა ისე, თითქოს 40%-ით შემცირდა ხარჯი წინა 2020 წელთან შედარებით. თუმცა მომავალ წელს, ფასი გაიზარდა, სუბსიდია მოიხსნა და ჯამში ამან გამოიწვია კომუნალური გადასახადის მკვეთრი ზრდა სტატისტიკურ მონაცემებში. ამ მეთოდიკური უზუსტობის გამო ინფლაციის არასწორი მაჩვენებელი მივიღეთ. ჩემი აზრით, რეალურად ინფლაცია 5%-ს არ უნდა აღემატებოდეს, ციფრებში დიდი აცდენა  მეთოდიკის ,,დამსახურებაა“, - განმარტავს სოსო არჩვაძე.

გარდა ამისა, სტატისტიკოსი საუბრობს გლობალურ ინფლაციაზეც, რის გავლენაც ადგილობრივ ბაზარზე ასევე დიდი მასშტაბისაა.

,,მსოფლიო ბაზარზე ვყიდულობთ სურსათის, რომელიც დაახლოებით 28%-ით არის გაძვირებული,  ნავთობპროდუქტებს, რომლის შესაძენად 2021 წელს გადავიხადეთ დაახლოებით 250 მილიონი დოლარით მეტი იმ რაოდენობის შესაძენად, რასაც წინა წელს ვყიდულობდით. 90 მილიონ დოლარზე მეტი სურსათშია გადახდილი, რაც საბოლოოდ ინფლაციაში აისახა. გარე ფაქტორი რომ არ ყოფილიყო და ქვეყნის შიგნითაც სწორად დათვლილიყო,  ჩვენ ინფლაცია 5%-ზე მაღალი არ გვექნებოდა“, - ამბობს არჩვაძე.

რაც შეეხება მოსალოდნელ ტენდენციას, სტატისტიკოსის პროგნოზით, თებერვალში გვექნება მაღალი ინფლაცია და მარტიდან თანდათან შემცირდება, მეთოდოლოგიური უზუსტობა, რაც დაშვებულ იქნა, დაკარგავს თავის გავლენას, ამასთან პროდუქციის გაიაფებას სეზონური ფაქტორიც ხელს შეუწყობს.  

მისივე შეფასებით, ამ ეტაპზე ფასები იმ დონეზეა მიღწეული, რომლის შემდეგაც გაძვირების ეკონომიკური საფუძველი არ არსებობს.

შეგახსენებთ, რომ 2022 წლის იანვარში, წინა თვესთან შედარებით, ინფლაციის დონემ საქართველოში 1.1 პროცენტი, ხოლო წლიური ინფლაციის მაჩვენებელმა 13.9 პროცენტი შეადგინა. 

მთავრობის პროგნოზით, უკვე გაზაფხულიდან ინფლაცია შემცირებას დაიწყებს და 2022 წლის ბოლოსკენ 3 პროცენტიან სამიზნე ნიშნულს დაუბრუნდება. 

მარი ჩიტაია