რა გავლენა აქვს ინფლაციას სამომხმარებლო ნედლეულის ბაზარზე და როგორ შეიძლება, რომ ის ჩვენს სასარგებლოდ გამოვიყენოთ ამ და სხვა თემებზე რადიო კომერსანტის გადაცემაში კომერსანტის დილა საფონდო ბირჟის ექსპერტმა ჯაბა დიხამინჯიამ ისაუბრა. მისი თქმით, ინფლაციის ასეთი ზრდა ინვესტორებში შიშს იწვევს.
„შეერთებული შტატების ბაზარზე მარტთან შედარებით აპრილის თვის ინფლაციის მაჩვენებელი 0,8%-ით გაიზარდა, რაც საკმაოდ მაღალია, რადგან ამერიკას 2008 წლის შემდეგ ინფლაციის ასეთი ზრდა არ ჰქონია. ინფლაციის მაჩვენებლის ასეთი ზრდა საინვესტიციო მიმართულებით ინვესტორებში შიშსა და შესაბამისად ცვლილებებს იწვევს და მინდა გითხრათ, რომ ამ მაჩვენებლის შემდეგ საფონდო ბირჟებზე ქმედება ძალიან რადიკალურად აისახა, ბირჟებზე ფასი დავარდა, რადგან 0,6%-იანი ზრდის მოლოდინი იყო. თუმცა ინფლაციამ მოლოდინს გადააჭარბა და 0,8% იანი ზრდა დაფიქსირდა.
მნიშვნელოვანი მომენტი არის ის, რომ როდესაც საინვესტიციო მიმართულებით ინფლაცია მზარდია, ინვესტორები, მენეჯერები და ფინანსურ სამყაროში აქტიურად მოთამაშე ადამიანები თავიანთ ქმედებას ცვლიან, საინვესტიციო მიმართულებებს აფინანსებენ და კაპიტალი სხვადასხვა მიმართულებით გადააქვთ.
მნიშვნელოვანი კითხვაა თუ სად არის მაღალი ინფლაციის დროს ინვესტიციის გაკეთება საინტერესო, რადგან ვიცით რომ ინფლაცია მოგებას ჭამს, დოლარს ასუსტებს და შესაბამისად სარგებელის მიღების მიზნით ადამიანები წყვეტენ თუ სად ჩადონ თავიანთი კაპიტალი, რომ მოგება დაგენერირდეს“, - აღნიშნა ჯაბა დიხამინჯიამ.
დიხამინჯიამ აღნიშნა, რომ ინფლაციისგან დაზღვეული სახაზინო ობლიგაციების დროს თუ ინფლაცია მზარდია, მაშინ ობლიგაციებიც მზარდ მოგებას იძლევიან და ამ მიმართულებით საფონდო ბირჟებზე საკმაოდ დიდი კაპიტალის აკუმულირება შეინიშნება.
მისივე თქმით, მეორე მნიშვნელოვანი საინვესტიციო მიმართულება არის უძრავი ქონება და ასევე ნედლეულის ბაზარი. დიხამინჯიამ აღნიშნა, რომ 2020 წლის მერე ნედლეულის ინდექსი საკმაოდ მომატებულია, წინა წლებში მთელი 12 თვის განმავლობაში დაღმასვლა შეინიშნებოდა, ხოლო 2020 წლიდან ამ ინდექსმა აღმასვლა დაიწყო.
„აშშ-ში უმუშევრობის მაჩვენებელი 6.1%-ზე არის ასული, შეიძლება ეს ციფრი მაღალი არ არის, მაგრამ პანდემიამდე ეს მაჩვენებელი 3.9-ზე იყო. ეს ნიშნავს იმას, რომ დაახლოებით 12 მილიონი ადამიანია დაუსაქმებელი, ესენი არიან ადამიანები რომლებიც თავიანთი ასაკიდან გამომდინარე შრომის უნარიანად ითვლებიან, გარდა ამისა გამოვიდა ინფორმაცია, რომ შრომის ბაზარი უმუშევრებს 8 მილიონ სამუშაო ადგილს სთავაზობს. პრეზიდენტმა ბაიდენმაც განაცხადა, რომ ადამიანები, რომლებიც უარს ამბობენ ასეთ სამუშაოებზე, შეიძლება ჩათვალოს რომ მათ უმუშევრობის შემწეობის შეწყვეტა არ სურთ. პანდემიის პერიოდში აშშ-მ დაახლოებით 4 ტრილიონი დოლარის დახმარების პაკეტი გასცა და პირდაპირი მნიშვნელობით ეს თანხა ადამიანებს დაურიგა, შესაბამისად ეს ადამიანები არიან შემოსავლიანი და არახელსაყრელ და შრომატევად საქმიანობას არ თანხმდებიან.“ - აღნიშნა ჯაბა დიხამინჯიამ.
როგორც დიხამინჯიამ აღნიშნა, ამ ეტაპზე ინვესტირებით არის დაკავებული და კომპანიის აქციებს ყიდულობს.
„ვყიდულობ მხოლოდ და მხოლოდ კომპანიის აქციებს და სხვა ბირჟებს არ ვეხები. მინდა გითხრათ, რომ სამი პოზიცია მიჭირავს. ეს პოზიციები გამოიყურება შემდეგნაირად.
ეს არის გეიმსტოპი, რომელიც ცოტა ხნის წინ ყბადაღებული თემა იყო და აქციის ფასები გავარდა 400$-მდე, შემდეგ დავარდა 40$ -მდე, ეს არის ონლაინ სათამაშო ბიზნესი და ამ კომპანიის მიმდინარე თვის 10 რიცხვში 153 დოლარად შევიძინე და მას შემდეგ დაახლოებით 10% -ან მოგებას აგენერირებს.
მეორე არის მაგნიტიკი ეს არის კომპანია, რომელიც ყიდის რეკლამებს ონლაინ, ანუ პლატფორმაა სადაც ადამიანებს შეუძლიათ თავიანთ კომპანიის რეკლამები გაყიდონ.
მესამე კომპანიის აქციები 17 რიცხვში შევიძინე და უკვე მაქვს 15%-იანი ზრდა. ეს არის ენერგოკომპანია, გამომდინარე იქიდან რომ გვაქვს ინფლაციის მაღალი მაჩვენებელი და ერთ-ერთი კომპონენტი ნედლეულზე ფასის ზრდიდან გამომდინარე არის ნავთობიც, ამ კომპანიის აქციები ვიყიდე გათვლით, რომ მაღალი ინფლაციის მაჩვენებელი სექტორს დამატებითი კაპიტალის შედინებაში დაეხმარება და ჩემი გათვლით სავარაუდოდ ამ კომპანიის აქციებიც უნდა გაიზარდოს.“ - აღნიშნა ჯაბა დიხამინჯიამ.
თაკო კვაჭანტირაძე