პანდემიის თითქმის დამარცხებულად გამოცხადების მიუხედავად, ეკონომიკაში პოზიტიური ცვლილებები ნაკლებად მოსალოდნელია. რეგიონში მიმდინარე ომი ამ მხრივ ბევრად მეტ პრობლემას შექმნის, ვიდრე კოვიდ-19-ის გამო იქნებოდა მოსალოდნელი. ამის შესახებ ,,კომერსანტთან“ ეკონომიკურ მეცნიერებათა
დოქტორი, ანალიტიკოსი ნიკა შენგელია საუბრობს და დასძენს, რომ მაღალი ინფლაცია მშპ-ს ფორმირებაზე გარკვეულ გავლენას მოახდენს და ზრდა დაახლოებით 5%-ის ფარგლებში დაფიქსირდება, რის გავლენასაც ფაქტობრივად ვერავინ იგრძნობს.
მიიღე ინფორმაცია უფრო სწრაფად „კომერსანტის“ Telegram-ზე.
,,24 თებერვლიდან, დაიწყო თუ არა ომი, პანდემია არ ახსოვს არავის, მსოფლიოშიც ასეა. ის, რა ნაბიჯებიც უნდა გადაედგათ - შეზღუდვების მოხსნა და სხვა, ამას უკვე აკეთებს ომი და შეიძლება ითქვას, უფრო ,,ეფექტურადაც“. ვფიქრობ, აქედან გამომდინარე, ბიუჯეტი აუცილებლად დასაკორექტირებელი იქნება. არსებული სიტუაციიდან გამომდინარე ცდილობენ, ჯანდაცვას რამენაირად შეუმცირონ თანხები და სხვა მიმართულებით გადაანაწილონ. კრიზისი აგვისტოში უფრო შესამჩნევი გახდება. შემოდგომა მძიმე იქნება როგორც საქართველოში, ასევე გლობალური მასშტაბითაც. რუსეთის მიმართ დაწესებულ სანქციებს ორმხრივი ქმედება აქვს და პიკში აგვისტოს შემდეგ შევა. ეკონომიკური ზრდის პროგნოზი 5-6% ის ფარგლებში იქნება თუ რამე განსაკუთრებული არ მოხდა. რუსეთიდან შემოსული კომპანიები ამ პროცესში მიიღებენ მონაწილეობას, მათ შორის, IT კომპანიები, რომლებიც ვერ ახდენენ ოპერირებას თავიანთ ქვეყანაში, ფირმები დაარეგისტრირეს საქართველოში, რაც მშპ-ზეც გარკვეულ გავლენას ახდენს და აისახება. ამდენად, ჯამურად მეტიც შეიძლება იყოს ეკონომიკური ზრდა, აგვისტოში მონაცემები აუცილებლად შეიცვლება, რაც ამ სიტუაციამ მოიტანა“, - აცხადებს ნიკა შენგელია ,,კომერსანტთან“.
ანალიტიკოსი ამბობს, რომ სწორი ეკონომიკური პოლიტიკის პირობებში შესაძლებელი იქნებოდა ომის ნეგატიური გავლენის შემსუბუქება, მაგრამ ამ მიმართულებით რეალურად არაფერი გაკეთებულა და იმპორტდამოკიდებულება არათუ ვერ შემცირდა, პირიქით, მეტი საჭიროება გაჩნდა.
,,პანდემიის გავლენაზე უკვე არავინ საუბრობს, ყველაფერი დაბრალდება რეგიონში არსებულ ომს, სანქციებს და გაძვირებულ ფასებს. სწორი ეკონომიკური პოლიტიკა რომ გაეტარებინათ - დაეწყოთ იმპორტდამოკიდებულების შემცირება, ხელი შეეწყოთ აგრარული პროდუქციის წარმოების ზრდასა და დასაქმებაზე, ასეთი შედეგი არ დადგებოდა. ფაქტობრივად საცალო ქსელში პირველადი მოხმარების საგნები კატასტროფულ ფასში იყიდება, ზოგიერთი პროდუქტის შემოტანა მაღალი ფასის გამო აზრს კარგავს და თანდათან ქრება დახლებიდან. ხშირად მანიპულირებენ იმით, რომ ექსპორტი იზრდება, მაგრამ მხოლოდ რეექსპორტის ხარჯზე, წარმოება არ გვაქვს და საკუთარი პროდუქტი, იშვიათი გამონაკლისის გარდა, ვერ გაგვაქვს. ასეთ ფონზე ეკონომიკური ზრდა რეალურად მხოლოდ ციფრებია და ამ სიკეთეს სინამდვილეში ვერავინ იგრძნობს, პირიქით, მაღალი ინფლაცია იმდენად დიდ პრობლემას შექმნის, რომ შეიძლება სოციალურ უკმაყოფილებამდეც მივიდეს საქმე, ვერც ამას გამოვრიცხავ“, - დასძენს ნიკა შენგელია.
შეგახსენებთ, რომ მსოფლიო ბანკმა ევროპისა და ცენტრალური აზიის რეგიონის ეკონომიკური მიმოხილვა გამოაქვეყნა, რომლის თანახმად, უკრაინაში მიმდინარე ომის ზემოქმედების გამო საქართველოს ეკონომიკური ზრდა შენელდება - მოსალოდნელია, 2022 წლისთვის თავდაპირველად პროგნოზირებული 5,5 პროცენტიანი ზრდის 2,5 პროცენტამდე ვარდნა.
გარდა ამისა, მსოფლიო ბანკის პროგნოზით, უკრაინის მშპ 2022 წელს შესაძლოა 45,1%–ით შემცირდეს, ხოლო რუსეთის – 11,2%–ით.
მარი ჩიტაია