რადიო „კომერსანტის“ დილის ეთერში ტურისტული კომპანია „ოდა დიემსის“ დამფუძნებელმა ვიკა შარიამ მაის ტურიზმის (MICE (Meetings, Incentives, Conferences, Exhibitions) tourism) მნიშვნელობასა და ამ მიმართულებით საქართველოს პოტენციალზე ისაუბრა. მან ხაზი გაუსვა, რომ მაღალმხარჯველუნარიანი ტურისტების ჩამოსაყვანად და მაის ტურიზმის გასავითარებლად ქვეყანას სტანდარტული. საერთაშორისო, ევროპული ავიახაზები ჭირდება, რომელიც დღის საათებში იფრენს.
„პანდემიამდე საქართველო კარგად პოზიციონირებდა საერთაშორისო ბაზრებზე, მაგრამ მერე სერიოზული ჩავარდნა მოხდა. ჰაერივით გვჭირდება ძლიერი პოზიციების დაბრუნება, რეკლამის და პრომოუშენის კუთხით. ამის გარეშე საქართველოში ევროპელ მაღალმხარჯველუნარიან სტუმარს ვერ ჩამოვიყვანთ. დაბალბიუჯეტიანი ავიახაზების - Wizz Air-ის და Ryanair-ის გარდა აუცილებლად გვჭირდება სტანდარტული საერთაშორისო, ევროპული ავიახაზები, ნორმალურ დღის საათებში ფრენებით იმიტომ, რომ გარდა მას-ტურიზმისა, გარდა კერძო პირებისა, ჩვენ ასევე გვჭირდება კორპორაციულ სეგმენტებზე დაბრუნება“, - განაცხადა ვიკა შარიამ.
მისი თქმით, მაის ტურიზმი - სექტორის ყველაზე მაღალშემოსავლიანი სეგმენტია, რომელიც ქვეყანაში კომპანიების საერთაშორისო კონფერენციებით შემოსვლას გულისხმობს.
„ამ მიმართულებას არ აქვს სეზონურობა. ყველა სეზონზე მუშაობს. 600 და 1000-კაციან ღონისძიებებზე მოთხოვნებს ახლა ვერ ვაკმაყოფილებთ. სხვა თუ არაფერი, არ გვაქვს კონგრეს-ცენტრი, რაც ჩვენს მეზობელ ქვეყნებში - სომხეთსა და აზერბაიჯანში არის. ვფოკუსირდეთ, თუნდაც, 100 და 200-კაციან ჯგუფებზე, რაც უკვე სანატრელია და პრობლემაა, რადგან ეს მიმართულება გაიყინა“, - განაცხადა ვიკა შარიამ
ვიკა შარიას თქმით, სტუმარ-მასპინძლობის სექტორში კიდევ ერთი მთავარი პრობლემა პერსონალის არარსებობაა.
„ინფრასტრუქტურა არსებობს, იხსნება საერთაშორისო ბრენდის სასტუმროები, ლოკალური ობიექტები, მაგრამ არ არსებობს პერსონალი, არავის უნდა სტუმარ-მასპინძლობის ინდუსტრიაში დაბრუნება და მუშაობა, იმიტომ რომ ბოლო წლების განმავლობაში ეს სუპერ არასტაბილური ინდუსტრიაა და ადამიანები მარტივად რჩებიან უმუშევრები, არ არსებობს სახელმწიფოს მხრიდან დახმარების და გვერდში დგომის ბერკეტი. შესაბამისად, ადამიანები უფრო ფრთხილობენ და კარიერულ განვითარებას სხვა მიმართულებით ირჩევენ. თუმცა, მე იმედიანად ვარ. იმიტომ, რომ ტენდენცია აღდგენისკენ მიდის. ჩვენ უნდა გამოვიყენოთ ჩვენი ქვეყნის აბსოლუტურად უნიკალური მახასიათებლები - ავთენტურობა და სრულიად არნახული გეოგრაფიული დივერსიფიკაცია“, - განაცხადა ვიკა შარიამ „კომერსანტის“ ეთერში.
მოამზადა მაკა ბიბილაშვილმა