„დისტრიბუციის მანქანებისთვის საპარკინგე ადგილების გამოყოფა ნელი ტემპით ხდება“ - ამის შესახებ რადიო „კომერსანტის“ გადაცემაში, „კომერსანტის დილა“ საქართველოს დისტრიბუტორთა ბიზნეს ასოციაციის ხელმძღვანელ,მა ივა ჭყონიამ ისაუბრა. მისი თქმით, თუ ასეთი ტემპით გაგრძელდა საპარკინგე ადგილების გამოყოფა, იდეალურ შემთხვევაში ამას ერთი წელი დასჭირდება, რაც კომპანიებისთვის ძალიან მძიმე ტვირთია, რადგან მათ უწევთ ჯარიმის სახით კოლოსალური თანხების გადახდა.
„მაღაზიაში პროდუქციას დრონებით ვერ მიიტანენ, როდესაც დისტრიბუცია მიდის, უბრალოდ ადგილი არ არსებობს მათთვის, რაც სასიცოცხლოდ მნიშვნელოვანია, ევროპულ ქვეყნებში არსებობს ასეთი პრაქტიკა, რომ სადისტრიბუციო მანქანები ბრენდირებულია, მათ აქვთ სტიკერი, არსებობს ბაზა და ამ მანქანებს უბრალოდ არ აჯარიმებენ.
ჩვენთან არის უკონტაქტო პატრული, რომელიც დადის და წერს ჯარიმებს და ეს თანხა არის კოლოსალური, ყველაზე კარგ შემთხვევაში გამოდის 5000 ლარი, ზოგჯერ არის შემთხვევები, რომ ჯარიმის ოდენობა 8000 და 10 000 ლარსაც კი აღწევს, სადისტრიბუციო კომპანიებს ჩემთან ყოველდღიურ რეჟიმში აქვთ კომუნიკაცია და მათი მდგომარეობა გაუსაძლისია, ეს საბოლო ჯამში პროდუქტის ფასწარმოქმნაზე აისახება, რადგან ეს ჯარიმა მათთვის გადასახადივით არის უკვე და თუ ამ თანხას სადმე არ ასახავენ, მაშინ კომპანია გახდება ზარალიანი.“ - აღნიშნა ივა ჭყონიამ
ჭყონიას თქმით, დღეს სულ რაღაც 60-მდე საპარკინგე ადგილია და ისიც არასრულად, მისივე თქმით, არის შემთხვევები, როდესაც ამ საპარკინგე ადგილას ერთ სადისტრიბუციო მანქანა დგას და მეორე ელოდება და ამ დროს ხდება მისი დაჯარიმება.
„თუ ამ მანქანების დასტიკერება არ მოხდა და ბაზა არ შეიქმნა, სექტორი ძალიან მძიმე ვითარებაში ჩავარდება. ეს ძალიან დიდი წნეხი იქნება ფასებზე. 10 ლარიანი ჯარიმაც კი საკმაოდ დიდი ტვირთი იყო და ახლა როდესაც 50 ლარი გახდა ეს თანხა წარმოუდგენელია. დაჯარიმება ხდება გახშირებული ტემპით, თითქოს კომპანიების დასჯაზე არიან გადასულები, ვფიქრობ, რომ აქ ლოიალურები უნდა ვიყოთ და დედაქალაქის სატრანსპორტო სამსახური ამაში ჩართული უნდა იყოს. ერთი ავტომობილი დღეში დაახლოებით 15-20 ობიექტს ემსახურება, როდესაც კომპანიას ჰყავს 10-ობით მანქანა წარმოიდგინეთ რა ოდენობის ჯარიმაზეა საუბარი.“ - აღნიშნა ივა ჭყონიამ .