საქართველოს ქსელური სუპერმარკეტების ბაზარზე ახალი მოთამაშე შედის. „გვირილა“ 2021 წელს დაფუძნებული კომპანიაა, რომელმაც თავისი პირველი სუპერმარკეტი თბილისში უკვე გახსნა და გაფართოების საკმაოდ ამბიციური გეგმები აქვს.

„გვირილას“ 100%-იანი წილის მფლობელი ბიზნესმენი ლაშა ჩოჩელია, რომელმაც რამდენიმე თვის უკან სუპერმარკეტების ქსელ „მაგნიტში“ თავისი მინორიტარული წილი — 9,96%-ი შპს „დეილის მიყიდა.

კომპანიის საინვესტიციო პორტფელი 18 მილიონი დოლარია. „გვირილა“, ქვეყნის მასშტაბით, მომდევნო 5 წლის მანძილზე 1000 ფილიალის გახსნას გეგმავს.

როგორც „კომერსანტს“ „გვირილას“ დამფუძნებელმა ლაშა ჩოჩელმა განუცხადა, წლის ბოლომდე ქვეყანაში „გვირილა“ 100 სუპერმარკეტით იქნება წარმოდგენილი, რისთვისაც ფართები კომპანიას უკვე ნაქირავები აქვს. ბიზნესმენი ამბობს, რომ 2022 წლის ბოლომდე 100-დან 70 მარკეტი თბილისში, ხოლო 30-იც რეგიონში გაიხსნება, სადაც სარემონტო სამუშაოები უკვე მიმდინარეობს. მაღაზიები გაიხსნება, როგორც ცენტრალურ ნაწილში ასევე გარეუბნებში. თბილისის გარდა „გვირილას“ ფართები უკვე აღებული აქვს რუსთავში და მცხეთა-მთიანეთის რეგიონში, თუმცა რეგიონში სად გაიხსნება პირველი მარკეტი ლაშა ჩოჩელი ვერ აკონკრეტებს და ამბობს, რომ პროცესი სარემონტო სამუშაოების დასრულებაზეა დამოკიდებული.

„უწყვეტი, სტაბილური ასორტიმენტი და ხელმისაწვდომი ფასები სახლთან ყველაზე ახლოს – სწორედ ეს არის უბნის მარკეტების ქსელი „გვირილა“ მთავარი დაპირება.

ჩვენი იაფი სუპერმარკეტების მიმართულებაა და ასე ვაპირებთ გაფართოებას. კონკურენციაში შევალთ ყველა მარკეტთან. ორიენტირებული ვიქნებით იაფ ფასებზე და მაღალ ხარისხზე. უბრალოდ, ჩვენს სუპერმარკეტებში პროდუქციის შედარებით მცირე ასორტიმენტი იქნება, გამომდინარე საფასო სეგმენტიდან“, აცხადებს „კომერსანტთან“ ბიზნესმენი.

ლაშა ჩოჩელის თქმით, „გვირილამ“ საკუთარი მინი საწარმოც გააკეთა, რაშიც 20 ათასი ლარის ინვესტიცია განახორციელა, სადაც პროდუქციის დაფასოება მოხდება. „გვირილას“ მიერ  დაფასოებული პროდუქცია, სხვა სუპერმარკეტების ქსელის მიერ დაფასოებული პროდუქციისგან განსხვავებით, ჯერჯერობით „გვირილას“ სახელით დაბრენდილი არ იქნება.