2021 წელს სატელეკომუნიკაციო ბაზრი 10% -ით გაიზარდა. ყველაზე მომგებიანი კომპანია ისევ მაგთია, მას კი სილქნეტი მოსდევს. 

„მაგთის“ 2021 წელს, წინა წელთან შედარებით შემოსავალი 12.6%-ით 513.9 მლნ ლარამდე გაეზარდა. კომპანიის მთლიანმა მოგებამ 261.2 მლნ ლარი შეადგინა, რაც 21.5%-ით მეტია წინა წლის იმავე პერიოდზე. მიუხედავად შემოსავლის ზრდისა, აღნიშნულ პერიოდში კომპანიას შეუმცირდა 948.3 მლნ ლარამდე აქტივები და 834.6 მლნ ლარამდე კაპიტალი.

2021 წლის მდგომარეობით კომპანია ასაქმებდა 1721 ადამიანს, რომელთა ხელფასებზე 47.2 მლნ ლარი დახარჯა. შპს „მაგთიკომის“ ძირითად საქმიანობას წარმოადგენს მობილური უკაბელო, ფიქსირებული უკაბელო („მაგთიფიქსი“) და ფიქსირებული საკაბელო სატელეფონო ქსელებისა და სატელიტური DTH (direct-to-home - პირდაპირ სახლში) ტელევიზიის („მაგთისატი“) ფლობა და ოპერირება. კომპანიის მესაკუთრეები არიან International Telcell Cellular, LLC, ამერიკის შეერთებულ შტატებში რეგისტრირებული კომპანია („International TC LLC”), რომელიც ფლობს კომპანიის 51%-ს და Telcell Wireless LLC, ამერიკის შეერთებულ შტატებში რეგისტრირებული კომპანია („Telcell Wireless“), რომელიც კომპანიაში 49%-იან წილს ფლობს. კომპანიის საბოლოო მშობელი კომპანიაა International TC LLC, ხოლო კომპანიის საბოლოო მაკონტროლებელ მხარეს წარმოადგენს გიორგი ჯოხთაბერიძე.

ზარალის შემდეგ მოგებაზე გავიდა „სილქნეტიც“. კომპანიამ 41.5 მლნ ლარის წმინდა მოგება მიიღო მაშინ როდესაც 2020 წელს კომპანიის ზარალი 80 მლნ ლარი იყო. სილქნეტის წლიური შემოსავალი გასულ წელს 413 მლნ ლარი იყო, რაც წლიურად 8%-იანი ზრდაა. ეს ზრდა ნაწილობრივ გაზრდილი კომუნალური ხარჯებითა და სხვა რამდენიმე ხარჯის ზრდით დაკომპენსირდა.  გასულ წელს კომპანიის მთლიანმა აქტივებმა 847.5 მლნ ლარი, ხოლო კაპიტალმა მინუს 48.8 მლნ ლარი შეადგინა.