ჩვენ გეგმაზომიერად მივყვებით ქალაქის გამწვანებას და ძალიან მნიშვნელოვანია ფონდი „ქართუს“ თანაინვესტირება ამ პროცესში, როგორც მთაწმინდის ფერდობის 700 ჰექტრიანი ფერდის ხელახალი გამწვანების პროექტში, ასევე იპოდრომის, სამომავლოდ ცენტრალური პარკის განაშენიანების კუთხით, - ამის შესახებ „ქართული ოცნება - დემოკრატიული საქართველოს“ საარჩევნო სიის პირველი ოცეულის წევრმა, თბილისის მერის მოადგილემ, მაია ბითაძემ „იმედის“ გადაცემა, „დღის ქრონიკაში“ განაცხადა.

„ჩვენი მიზანია ერთ სულ მოსახლეზე გავზარდოთ გამწვანების კოეფიციენტი და მივუახლოვდეთ ევროპულ სტანდარტს. ამჟამად მიმდინარეობს ჯამში 17 ჰექტრამდე მწვანე სივრცის მოწყობა, ხოლო მომდევნო 4 წლის განმავლობაში, დაახლოებით 60 ჰექტრამდე რეაბილიტაცია და ახალი პარკების მშენებლობა გვაქვს დაგეგმილი როგორც დიღომში ასევე ვაზისუბანში და თემქის ხევში.

მთაწმინდის ფერდი წლების განმავლობაში ეროზიას განიცდიდა და იქ მცენარეები ამორტიზირებულია და ჩენ ყველამ უნდა გავიგოთ, რომ ამას განახლება სჭირდება. თითქმის საუკუნეა თბილისის ამდაგვარი გამწვანების სამუშაოები არ ჩატარებულა და ეს არის კიდევ ერთი ნათელი მაგალითი იმისა, თუ როგორ უდგება „ქართული ოცნება“ უბრალოდ გარემოს დაცვით სტანდარტებს და როგორც ცდილობს და აღწევს, რომ ეკოლოგიური წონასწორობა ყოველწლიურად გაუმჯობესდეს“, - განაცხადა მაია ბითაძემ.

15 ოქტომბერს საერთაშორისო საქველმოქმედო ფონდ „ქართუს“ დაფინანსებით მიმდინარე, თბილისის ურბანული ტყის ლანდშაფტის აღდგენისა და რეკრეაციული ინფრასტრუქტურის განვითარების პროექტის შუალედური ანგარიშის პრეზენტაცია გაიმართა.

პროექტის მიზანია, არსებული ტერიტორიის ლანდშაფტი ოთხივე სეზონზე იყოს გათვლილი. ის ითვალისწინებს, როგორც ტურისტული, ისე სპორტული საფეხმავლო ბილიკების მოწყობას; ექსტრემალური სპორტის მოყვარულთათვის გათვალისწინებული იქნება სამთო ველოსიპედებისა და სხვა სპორტული აქტივობებისთვის გზები; მოეწყობა დასასვენებელი სივრცეები, საპიკნიკე ადგილები, სანაგვე ურნები და გარე განათების სისტემები.

imedinews.ge