ანტიკრიზისულ გეგმის პირველი პაკეტის ფარგლებში, ჯერ კიდევ მარტში, შევთავაზეთ მოსახლეობას ღონისძიებები, რომელიც მოიცავდა როგორც საბანკო სესხების გადავადებას, ასევე სამთვიან პერიოდში კომუნალური გადასახადების დაფინანსებას სახელმწიფოს მხრიდან. შემდგომი შეთავაზებები ეხებოდა სოციალურად დაუცველ მოსახლეობას, შეზღუდული შესაძლებლობების მქონე პირებს და ა. შ. მთელი ეს პერიოდი აქტიურად ვმუშაობდით იმ პირების იდენტიფიცირებაზე, ვისაც დამატებით სჭირდება სახელმწიფოს დახმარება და სწორედ ამ მიმართულებით შემუშავდა ახალი ანტიკრიზისული პაკეტი, რომელიც დაახლოებით 400 მილიონი ლარის ოდენობის ღონისძიებებს ფარავს, - ამის შესახებ დღეს ვიცე-პრემიერმა მაია ცქიტიშვილმა მთავრობის სხდომის შემდეგ ჟურნალისტებს განუცხადა.

„17წლის ჩათვლით ბავშების ოჯახები, რა თქმა უნდა, ერთ-ერთი მთავარი ბენეფიციარები არიან და თითო ბავშვზე 200 ლარიანი პაკეტი, განსაკუთრებით ახალი სასწავლო წლის დაწყებამდე, ძალიან მნიშვნელოვანი დახმარება იქნება ოჯახებისთვის. რაც შეეხება კომუნალური გადასახადს, უკვე 1 200 000 ოჯახმა ისარგებლა ელექტროენერგიის და წყლის გადასახადის ნაწილში, ხოლო დაახლოებით 700 000 ოჯახმა ისარგებლა გაზის გადასახადისსუბსიდირებით. ზამთრის პერიოდი არ იქნება მარტივი და შესაბამისად ნოემბერი, დეკემბერი, იანვარი და თებერვალი იქნება ის 4 თვე, როცა სახელმწიფოამ მიმართულებით კვლავ შეეხიდება ოჯახებს,“ - აღნიშნა მაია ცქიტიშვილმა.

რეგიონული განვითარებისა და ინფრასტრუქტურის მინისტრმა ხაზი გაუსვა ბიძინა ივანიშვილის შემოწირულობას პანდემიის პერიოდში და აღნიშნა, რომ სწორედ ივანიშვიკლის ოჯახის მიერ სპეციალურ ფონდში ჩარიცხული 130 მილიონი ლარის ფარგლებში მოხერხდა 17 წლამდე ასაკის ბავშვების დახმარება.

„ეს შემოწირულობა იყო ერთ-ერთი ყველაზე დიდი დახმარება კერძო პირის მხრიდან, რომელიც სხვა ქვეყნებშიც განხორციელდა. სწორედ ასეთი საქველმოქმედო ღონისძებების შედეგად, რომელშიც ჩართულნი არიან ფიზიკური პირები, საჯარო მოხელეები, ბიზნესის წარმომადგენლები,მოგვეცა შესაძლებლობა, რომ ბევრად უფრო მოცულობითი პაკეტი შეგვეთავაზებინა მოსახლეობისთვის. აუცილებლად მინდა გამოვეხმაურო სტუდენტებისთვის გათვალისწინებულ დახმარებას. ბოლო დროს, როცა ბევრ ოჯახსშეუმცირდა შემოსავლები, სტუდენტების გარკვეული ნაწილმა ვეღარ გადაიხადა სწავლის საფასური, რის გამოც მათ შეუჩერდათ სტატუსი და სწორედ მათზე გავრცელდება დახმარება, რაც სტუდენტებს სწავლის გაგრძელების საშუალებას მისცემს, - თქვა მაია ცქიტიშვილმა.

ვიცე-პრემიერის თქმით, ახალი ანტიკრიზისული პაკეტი არის სამართლიანი, მიზნობრივი და მიმართულია იმ ფენებზე, რომელსაც ყველაზე მეტად სჭირდება სახელმწიფოს დახმარება.