საკოორდინაციო საბჭომ მიიღო გადაწყვეტილება, რომ 24 დეკემბრიდან - 2 იანვრის ჩათვლით შეზღუდვების შემსუბუქება არ განხოციელდეს იმ მასშტაბით, რა მასშტაბითაც ეს იყო დაგეგმილი თავდაპირველად, - ამის შესახებ რეგიონული განვითარებისა და ინფრასტრუქტურის მინისტრის მოვალეობის შემსრულებელმა მაია ცქიტიშვილმა საკოორდინაციო საბჭოს სხდომის შემდეგ გამართულ ბრიფინგზე განაცხადა.
მთავრობის ადმინისტრაციის პრესსამსახურის ინფორმაციით, მაია ცქიტიშვილმა დეტალურად ისაუბრა შეზღუდვებისა და დაშვებების შესახებ, რომელიც საკოორდინაციო საბჭომ 24 დეკემბრიდან - 2 იანვრის ჩათვლით პერიოდში დაადგინა.
„ძალაში რჩება მუნიციპალური ტრანსპორტის შეზღუდვა დიდ ქალაქებში - თბილისში, რუსთავში, ქუთაისში, ბათუმში, გორში, ზუგდიდში, ფოთსა და თელავში. მუნიციპალური ტრანსპორტი არ იფუნქციონირებს 24 დეკემბრიდან - 2 იანვრის ჩათვლით პერიოდში.
ასევე, ძალაში რჩება საქალაქთაშორისო ტრანსპორტის შეზღუდვა მთელი ქვეყნის მასშტაბით, როგორც ეს დადგენილი იყო 28 ნოემბრიდან.
სამწუხაროდ, ვერ გაიხსნება ბაზრობები. იმუშავებენ აგრარული ბაზრები ისევე, როგორც ისინი ფუნქციონირებენ 28 ნოემბრის შემდეგ და იმუშავებენ იმ პირობით, რომ სრულად დაიცავენ უსაფრთხოების ყველა წესს, რომელიც დადგენილია დღეის მდგომარეობით.
24 დეკემბრიდან - 2 იანვრის ჩათვლით ზემოთაღნიშნულ დიდ ქალაქებში დაშვებული იქნება სავაჭრო ობიექტების ფუნქციონირება, იმ შემთხვევაში, თუ ისევ და ისევ დაიცავენ ყველა იმ წესს, რომელიც არის დადგენილი დღეისთვის და მეტიც, ჩვენ ასევე კონსულტაციების შედეგად, როგორც ეპიდემიოლოგებთან, ისე ბიზნესის წარმომადგენლებთან, მივიღეთ გადაწყვეტილება დამატებითი რეგულაციების დაწესების თაობაზე, რომლებიც მეტად დაიცავს მომხმარებლებს სავაჭრო ქსელებში ვიზიტის დროს, კერძოდ, მაღაზიების სამუშაო საათები განისაზღვრა დილის 07:00 საათიდან 19:00 საათამდე, მომხმარებლების სავაჭრო სივრცეში დაშვება უნდა მოხდეს ნაკადების მკაცრი მართვით. ამისთვის მაღაზიების ფართის ყოველ 20 კვ.მ-ზე დაიშვება არაუმეტეს ერთი მომხმარებლისა. მაღაზიების როგორც შიდა, ასევე გარე სივრცეებში უნდა მოხდეს მომხმარებელთა რიგების მკაცრი მართვა, რათა დაცული იყოს ყველა ზომა, როგორიცაა სოციალური დისტანცია, პირბადის სწორი მოხმარება. ფასდაკლებების აქციები უნდა გამოცხადდეს ძირითადად ან დილის საათებში, ან ონლაინ გაყიდვების დროს, რათა არ იყოს დაშვებული მომხმარებლების დიდი კონცენტრაცია მაღაზიებში. ტანსაცმლის მაღაზიებში არ იმუშავებს გასახდელები. ამასთან, მომხმარებელთა ინტერესების დაცვის მიზნით მაღაზიებმა უნდა დაუშვან პროდუქციების დაბრუნება ან გადაცვლა 1 თვის განმავლობაში და ეს უნდა მოხდეს მხოლოდ პირველი თებერვლის შემდეგ,“ - განაცხადა მაია ცქიტიშვილმა.
მისი თქმით, ნებისმიერი დარღვევის დადგენის შემთხვევაში ობიექტების მიმართ გამოყენებული იქნება კანონით დადგენილი ღონისძიებები მათ შორის, როგორც დაჯარიმება, ასევე საქმიანობის შეჩერება.
„სავაჭრო ცენტრებში იკრძალება კვების ობიექტების ფუნქციონირება, მათ შორის გატანის სერვისით. ყველა სივრცეში და მაღაზიის გარეთ რიგებში დაცული უნდა იყოს სოციალური დისტანცია და პირბადეების სწორად ტარების მოთხოვნები. აღნიშნულზე სრული პასუხისმგებლობა ეკისრება მაღაზიების და სავაჭრო ობიექტების ადმინისტრაციას. ნებისმიერი დარღვევის დადგენის შემთხვევაში ობიექტების მიმართ გამოყენებული იქნება კანონით დადგენილი ყველა ღონისძიება, როგორც დაჯარიმება, ასევე საქმიანობის შეჩერება,“ - განაცხადა მაია ცქიტიშვილმა.
მისივე თქმით, საბჭოს გადაწყვეტილებით, ქვეყნის მასშტაბით დაშვებული სასტუმროების რესტორნები იმუშავებენ მხოლოდ 21:00 მდე, ხოლო 21:00-დან დაშვებული იქნება მხოლოდ ნომერში მომსახურების სერვისი.
„მოგეხსენებათ, რომ დღეის მდგომარეობით სათხილამურო კურორტების გარდა, მთელი ქვეყნის მასშტაბით დაშვებული იყო სასტუმროების და მათთან არსებული რესტორნების ფუნქციონირება მხოლოდ სასტუმროების სტუმრებისთვის. თუმცა თითოეული ჩვენგანი ხედავს, რომ სასტუმროები ხშირ შემთხვევაში, ცდილობენ, გვერდი აუარონ ამ აკრძალვას. ჰქონდათ მცდელობა, რომ გვერდი აევლოთ კულტურული და გასართობი ღონისძიებების აკრძალვისთვის და სასტუმროები მასიურად გვთავაზობენ სადღესასწაულო სუფრების გამართვას. შესაბამისად, ჩვენ მივიღეთ გადაწყვეტილება, რომ სასტუმროების რესტორნები იმუშავებენ მხოლოდ 21:00 მდე, ხოლო 21:00-დან დაშვებული იქნება მხოლოდ ნომერში მომსახურების სერვისი. სხვა რესტორნები და კვების ობიექტები ქვეყნის მასშტაბით გააგრძელებენ მუშაობას მხოლოდ გატანის სერვისზე,“ - განაცხადა მაია ცქიტიშვილმა.